அமெரிக்கா மற்றும் ஈரான் இடையிலான போர் (Operation Epic Fury) மூன்றாவது வாரத்தை எட்டியுள்ள நிலையில், ஈரானின் கார்க் தீவு (Kharg Island) மீதான அமெரிக்காவின் தாக்குதலுக்குப் பதிலடியாக, ஐக்கிய அரபு அமீரகத்தில் உள்ள புஜைரா (Fujairah) எண்ணெய் முனையத்தின் மீது ஈரான் ட்ரோன் தாக்குதல்களை நடத்தியுள்ளது. இந்தத் தாக்குதலால் எண்ணெய் சேமிப்புக் கிடங்குகளில் பெரும் தீ விபத்து ஏற்பட்டு, வானத்தை முட்டும் அளவுக்குக் கரும்புகை சூழ்ந்துள்ளது. உலகளாவிய கச்சா எண்ணெய் தேவையில் சுமார் 2 சதவீதத்தைப் பூர்த்தி செய்யும் இந்த முக்கியமான முனையத்தில், பாதுகாப்பு கருதி எண்ணெய் ஏற்றுமதிப் பணிகள் சனிக்கிழமை முதல் தற்காலிகமாக நிறுத்தப்பட்டுள்ளன.
முன்னதாக, ஈரானின் எண்ணெய் ஏற்றுமதியில் முக்கியப் பங்கு வகிக்கும் கார்க் தீவின் மீது அமெரிக்கா நடத்திய தாக்குதலில், அங்கிருந்த ராணுவக் கட்டமைப்புகள் முற்றிலுமாக அழிக்கப்பட்டதாக அதிபர் டொனால்ட் ட்ரம்ப் அறிவித்தார். இதற்கு கடும் கண்டனம் தெரிவித்த ஈரான், "எங்கள் எரிசக்தி கட்டமைப்புகள் மீது கை வைத்தால் பிராந்தியத்தில் உள்ள அமெரிக்க நட்பு நாடுகளின் எண்ணெய் கிணறுகள் சாம்பலாகும்" என எச்சரித்திருந்தது. அதன் தொடர்ச்சியாகவே, அமீரகத்தின் புஜைரா மற்றும் துபாயின் ஜபெல் அலி போன்ற துறைமுகங்களை இலக்கு வைத்து ஈரான் ஏவுகணைகளையும் ட்ரோன்களையும் ஏவியுள்ளது.
இந்தத் தாக்குதல் சம்பவத்தைத் தொடர்ந்து பேசிய அதிபர் ட்ரம்ப், தாங்கள் கார்க் தீவின் எண்ணெய் சுத்திகரிப்பு நிலையங்களை இன்னும் தாக்கவில்லை என்றும், ஆனால் ஈரான் தொடர்ந்து ஹார்முஸ் ஜலசந்தியை (Strait of Hormuz) முடக்க முயன்றால் அந்த முடிவை மறுபரிசீலனை செய்ய நேரிடும் என்றும் எச்சரித்துள்ளார். வளைகுடா பிராந்தியத்தில் நிலவும் இந்த அசாதாரண சூழல் காரணமாக உலகச் சந்தையில் கச்சா எண்ணெய் விலை 40 சதவீதம் வரை உயர்ந்துள்ளது. இது உலக நாடுகளின் பொருளாதாரத்தில் பெரும் தாக்கத்தை ஏற்படுத்தத் தொடங்கியுள்ளது.
ஹார்முஸ் ஜலசந்தியை மீண்டும் சர்வதேசப் போக்குவரத்திற்குத் திறந்து விடுவதை உறுதி செய்ய, உலக நாடுகள் ஒன்றிணைய வேண்டும் என ட்ரம்ப் அழைப்பு விடுத்துள்ளார். குறிப்பாக சீனா, பிரான்ஸ், ஜப்பான், தென் கொரியா மற்றும் பிரிட்டன் ஆகிய நாடுகள் தங்களது போர்க்கப்பல்களை அனுப்பி எண்ணெய் டாங்கர்களுக்குப் பாதுகாப்பு அளிக்க வேண்டும் என அவர் கேட்டுக்கொண்டுள்ளார். அதே சமயம், ஹார்முஸ் ஜலசந்தியின் வடக்குக் கரையில் உள்ள ஈரானின் ஏவுகணை மற்றும் ட்ரோன் ஏவுதளங்களை அமெரிக்கப் படைகள் தொடர்ந்து குண்டுவீசித் தாக்கி வருவதால் போர் தீவிரமடைந்து வருகிறது.
