மத்திய கிழக்கில் அமெரிக்கா மற்றும் இஸ்ரேல் முன்னெடுத்து வரும் 'ஆபரேஷன் எபிக் பியூரி' (Operation Epic Fury) இராணுவ நடவடிக்கை ஆறாவது நாளை எட்டியுள்ள நிலையில், பாரசீக வளைகுடாவில் அமெரிக்கத் தொடர்புடைய எண்ணெய் கப்பல் ஒன்றை ஏவுகணை மூலம் தாக்கி அழித்துள்ளதாக ஈரான் அதிரடியாக அறிவித்துள்ளது. இன்று (மார்ச் 5) காலை வடக்கு வளைகுடா பகுதியில் நிகழ்ந்த இந்தத் தாக்குதலில், குறித்த கப்பல் தீப்பற்றி எரிந்து வருவதாக ஈரானியப் புரட்சிகர பாதுகாப்புப் படை (IRGC) தெரிவித்துள்ளது. அமெரிக்க நீர்மூழ்கிக் கப்பல் ஈரானின் 'ஐரிஸ் டெனா' (IRIS Dena) போர்க்கப்பலை மூழ்கடித்ததற்குப் பதிலடியாக இந்த நடவடிக்கை எடுக்கப்பட்டுள்ளது.

இந்தத் தாக்குதல் குறித்துத் தகவல் தெரிவித்துள்ள பிரிட்டனின் கடல்சார் வர்த்தக அமைப்பு (UKMTO), குவைத் கடற்கரைக்கு அப்பால் நங்கூரமிட்டிருந்த எண்ணெய் கப்பல் ஒன்றின் அருகே பெரிய வெடிப்புச் சத்தம் கேட்டதாகவும், அதைத் தொடர்ந்து சிறிய படகுகள் அங்கிருந்து வெளியேறியதாகவும் உறுதிப்படுத்தியுள்ளது. கப்பலின் சரக்குத் தொட்டியிலிருந்து எண்ணெய் கசிவு ஏற்பட்டுள்ள போதிலும், அதிர்ஷ்டவசமாகப் பணியாளர்கள் அனைவரும் பாதுகாப்பாக இருப்பதாகத் முதற்கட்ட தகவல்கள் தெரிவிக்கின்றன. ஈரானிய அரசுத் தொலைக்காட்சி, "தங்கள் கடல் எல்லைக்குள் நுழையும் அமெரிக்க மற்றும் இஸ்ரேலியக் கப்பல்கள் எரிக்கப்படும்" என்று பகிரங்கமாக எச்சரித்துள்ளது.

முன்னதாக, மார்ச் 4-ம் தேதி இலங்கை அருகே சர்வதேசக் கடற்பரப்பில் பயணித்துக் கொண்டிருந்த ஈரானியப் போர்க்கப்பலான 'ஐரிஸ் டெனா', அமெரிக்காவின் மார்க்-48 (Mark 48) வகை டார்பிடோ ஏவுகணை மூலம் மூழ்கடிக்கப்பட்டது. இந்தச் சம்பவத்தில் 87 ஈரானிய வீரர்கள் கொல்லப்பட்டனர். இந்தியக் கடற்படையின் சிறப்பு விருந்தினராகப் பங்கேற்றுத் திரும்பிய தங்களின் கப்பல் மீது நடத்தப்பட்ட இந்த "மறைமுகத் தாக்குதலுக்கு" அமெரிக்கா மிகக் கடுமையான விலையைக் கொடுக்க வேண்டியிருக்கும் என்று ஈரானிய வெளியுறவுத் துறை அமைச்சர் அப்பாஸ் அரக்ச்சி எச்சரித்திருந்தார். அதன் தொடர்ச்சியாகவே இன்றைய வளைகுடா தாக்குதல் பார்க்கப்படுகிறது.

தற்போது ஹோர்முஸ் நீரிணை (Strait of Hormuz) முழுமையாக ஈரானின் கட்டுப்பாட்டில் கொண்டு வரப்பட்டுள்ளதாக அறிவிக்கப்பட்டுள்ளதால், உலகளாவிய கச்சா எண்ணெய் விநியோகம் பெரும் கேள்விக்குறியாகியுள்ளது. அமெரிக்கா தனது போர்க்கப்பல்கள் மூலம் வணிகக் கப்பல்களுக்குப் பாதுகாப்பு வழங்க முன்வந்துள்ள போதிலும், ஈரானின் 'சுவர்ம் ட்ரோன்' (Swarm Drone) மற்றும் ஏவுகணைத் தாக்குதல்களால் வளைகுடா பகுதி தற்போது போர்க்களமாக மாறியுள்ளது. இந்தப் பதற்றம் காரணமாகச் சர்வதேசச் சந்தையில் கச்சா எண்ணெய் விலை கடுமையாக உயர்ந்து வருவதுடன், உலகப் பொருளாதாரம் பெரும் நெருக்கடியைச் சந்தித்து வருகிறது.