எண்ணெய் கப்பல்களை தாக்க வெடிகுண்டு படகுகளைப் பயன்பயன்படுத்தும் ஈரான்

மத்திய கிழக்கில் ஈரான் மற்றும் அமெரிக்க-இஸ்ரேல் படைகளுக்கு இடையே நடைபெற்று வரும் போர் தீவிரமடைந்துள்ள நிலையில், ஈராக் நாட்டின் பாஸ்ரா (Basra) கடற்கரைக்கு அருகே நங்கூரமிட்டிருந்த இரண்டு வெளிநாட்டு எண்ணெய் கப்பல்கள் மீது நேற்று புதன்பிழமை (மார்ச் 11, 2026) இரவு பாரிய தாக்குதல் நடத்தப்பட்டுள்ளது. வெடிபொருட்கள் நிரப்பப்பட்ட ஈரானிய 'காமிகாஸே' (Kamikaze) படகுகள் அல்லது நீர்க்கீழ் ட்ரோன்கள் இந்தக் கப்பல்கள் மீது மோதி வெடித்ததில், கப்பல்கள் தீப்பிடித்து எரியத் தொடங்கின. இந்த விபத்தில் ஒரு மாலுமி உயிரிழந்துள்ளதோடு, 38 பேர் பத்திரமாக மீட்கப்பட்டுள்ளதாக ஈராக் அதிகாரிகள் உறுதிப்படுத்தியுள்ளனர்.

தாக்குதலுக்குள்ளான கப்பல்கள் மால்டா நாட்டின் கொடியுடன் கூடிய 'செஃபிரோஸ்' (Zefyros) மற்றும் மார்ஷல் தீவுகளின் கொடியுடன் கூடிய 'சேஃப்சீ விஷ்ணு' (Safesea Vishnu) என அடையாளம் காணப்பட்டுள்ளன. இதில் 'சேஃப்சீ விஷ்ணு' கப்பல் அமெரிக்காவைத் தலைமையிடமாகக் கொண்ட ஒரு நிறுவனத்திற்குச் சொந்தமானது என்பது குறிப்பிடத்தக்கது. ஈராக் எல்லைக்குள் புகுந்து நடத்தப்பட்ட இந்தத் தாக்குதலை ஈராக்கிய இராணுவம் வன்மையாகக் கண்டித்துள்ளதுடன், இது நாட்டின் இறையாண்மையை மீறும் செயல் என்றும், இதற்கு எதிராகச் சர்வதேசச் சட்ட நடவடிக்கைகளை எடுக்கப் போவதாகவும் ஈராக் தெரிவித்துள்ளது.

ஈரானின் அரசு ஊடகமான IRIB வெளியிட்டுள்ள செய்தியில், "பாரசீக வளைகுடாவில் இரண்டு எண்ணெய் கப்பல்கள் வெற்றிகரமாகத் தகர்க்கப்பட்டுள்ளன" என்று ஈரான் தரப்பு அதிகாரப்பூர்வமாகப் பொறுப்பேற்றுள்ளது. அமெரிக்கா மற்றும் இஸ்ரேல் மீதான போரின் ஒரு பகுதியாக, வளைகுடா நாடுகளின் எரிசக்தி விநியோகத்தைத் தடுத்து நிறுத்தும் நோக்கில் இத்தகைய தாக்குதல்கள் முன்னெடுக்கப்படுவதாக ஈரான் தெரிவித்துள்ளது. இந்தச் சம்பவத்தைத் தொடர்ந்து, பாதுகாப்பு கருதி ஈராக்கின் முக்கிய எண்ணெய் முனையங்கள் (Oil Terminals) தற்காலிகமாக மூடப்பட்டுள்ளன.

சர்வதேச அளவில் இந்தத் தாக்குதல் பெரும் அதிர்வலைகளை ஏற்படுத்தியுள்ளது. உலக நாடுகளுக்குச் செல்லும் கச்சா எண்ணெய் விநியோகப் பாதையில் ஈரான் தொடர்ந்து அச்சுறுத்தல் விடுத்து வருவதால், எரிசக்தி சந்தையில் விலை ஏற்றம் ஏற்படக்கூடும் என அஞ்சப்படுகிறது. ஐக்கிய நாடுகள் சபையின் பாதுகாப்பு கவுன்சில் இந்த வன்முறைச் செயல்களை உடனடியாக நிறுத்துமாறு ஈரானை வலியுறுத்தியுள்ளது. போர்க்களத்தில் அமெரிக்காவின் அழுத்தம் அதிகரித்து வரும் நிலையில், ஈரான் தனது கடல்சார் தாக்குதல் வியூகங்களைத் தீவிரப்படுத்தி வருவது உலகளாவிய கவலைகளை அதிகரித்துள்ளது.