ஈரான் போர் 'நிறைவடையும் நிலையில் உள்ளது': அமெரிக்க ஜனாதிபதி டொனால்ட் ட்ரம்ப் அதிரடி

ஈரான் மற்றும் அமெரிக்கா-இஸ்ரேல் படைகளுக்கு இடையே கடந்த பிப்ரவரி 28 முதல் நடைபெற்று வரும் போர், தற்போது "கிட்டத்தட்ட நிறைவடையும் நிலையை" (Very complete) எட்டியுள்ளதாக அமெரிக்க ஜனாதிபதி டொனால்ட் ட்ரம்ப் தெரிவித்துள்ளார். புளோரிடாவில் உள்ள தனது டோரல் கோல்ஃப் மைதானத்தில் செய்தியாளர்களிடம் பேசிய அவர், ஈரானின் இராணுவக் கட்டமைப்புகள், கடற்படை மற்றும் ஏவுகணைத் தளங்கள் அமெரிக்கத் தாக்குதல்களால் பெருமளவு அழிக்கப்பட்டுவிட்டதாகக் குறிப்பிட்டார். "ஈரானிடம் இராணுவ ரீதியாக தற்போது எதுவும் மிச்சமில்லை" என்று அவர் தனது உரையில் அழுத்தமாகக் கூறியுள்ளார்.

இந்த இராணுவ நடவடிக்கையை ஒரு "சிறிய பயணம்" (Short-term excursion) என்று வர்ணித்த ட்ரம்ப், ஈரானைத் தாங்கள் தாக்கவில்லை என்றால், அந்த நாடு நூறு சதவீதம் அமெரிக்கா மற்றும் அதன் நட்பு நாடுகள் மீது தாக்குடல் நடத்தத் தயாராக இருந்ததாகத் தெரிவித்தார். "ஒரே வாரத்தில் அவர்கள் நம்மைத் தாக்கத் திட்டமிட்டிருந்தனர், அதற்கான அனைத்து ஆதாரங்களும் நம்மிடம் உள்ளன" என்று அவர் விளக்கமளித்துள்ளார். ஈரானின் அச்சுறுத்தலை முன்கூட்டியே தடுத்து நிறுத்துவதற்காகவே இந்த 'ஆபரேஷன் எபிக் பியூரி' (Operation Epic Fury) தொடங்கப்பட்டதாக அவர் மீண்டும் உறுதிப்படுத்தினார்.

ஈரானின் புதிய உச்ச தலைவராக மொஜ்தபா கமேனி பொறுப்பேற்றுள்ள நிலையில், அவரோடு பேச்சுவார்த்தை நடத்தும் எண்ணம் தமக்கு இல்லை என்று ட்ரம்ப் கூறியுள்ளார். இருப்பினும், ஈரானின் மின்சாரக் கட்டமைப்பு போன்ற மிக முக்கியமான சில இலக்குகளைத் தற்போதைக்குத் தாக்காமல் நிறுத்தி வைத்துள்ளதாகவும், தேவைப்பட்டால் அவை பின்னர் தகர்க்கப்படும் என்றும் அவர் எச்சரித்துள்ளார். ஹார்முஸ் ஜலசந்தி வழியாக எண்ணெய் விநியோகத்தை ஈரான் தடுத்தால், இதுவரை இல்லாத அளவிற்கு இருபது மடங்கு கடுமையான பதிலடி கொடுக்கப்படும் என்றும் அவர் குறிப்பிட்டுள்ளார்.

ட்ரம்பின் இந்த அறிவிப்பைத் தொடர்ந்து சர்வதேச சந்தையில் கச்சா எண்ணெய் விலை கணிசமாகக் குறைந்துள்ளதுடன், பங்குச் சந்தைகள் ஏற்றம் கண்டுள்ளன. போர் விரைவில் முடிவுக்கு வரும் என்ற நம்பிக்கையில் முதலீட்டாளர்கள் ஆர்வம் காட்டி வருகின்றனர். இருப்பினும், ஈரானியப் புரட்சிகர காவல்படை (IRGC) "போர் எப்போது முடியும் என்பதை நாங்களே தீர்மானிப்போம்" என்று பதிலடி கொடுத்துள்ளதால், களத்தில் இன்னும் பதற்றமான சூழலே நிலவுகிறது. மார்ச் 10-ம் தேதியான இன்று வரை அமெரிக்கத் தரப்பில் எட்டு இராணுவத்தினர் உயிரிழந்துள்ள நிலையில், போரின் அடுத்தகட்ட நகர்வுகள் உலக நாடுகளால் கூர்ந்து கவனிக்கப்படுகின்றன.