தமிழக முதலமைச்சரும் தமிழக வெற்றி கழகத்தின் (தவெக) தலைவருமான சி. ஜோசப் விஜய் மீது அவரது அடியாளான “மிஸ்டர் ஜே” (Mr. J) என்பவரை முன்னிறுத்தி மிகக் கடுமையான பாலியல் மாபியா குற்றச்சாட்டுகளை முன்வைத்துள்ளார் அரசியல் பிரமுகரும் ஊட்டச்சத்து நிபுணருமான திவ்யா சத்யராஜ். அண்மையில் நடைபெற்ற பொதுக்கூட்டம் ஒன்றில் பேசிய அவர், தவெக அரசு சோசியல் மீடியாவில் தங்களுக்கு எதிராகக் கேள்வி கேட்கும் பெண்களை அசிங்கமாகச் சித்தரித்து ஒடுக்குவதற்காகவே 3,000 கோடி ரூபாய் செலவில் ஒரு கார்ப்பரேட் மாபியா நெட்வொர்க்கை நடத்தி வருவதாகக் கூறி தமிழக அரசியலில் பெரும் அதிர்வலைகளை ஏற்படுத்தியுள்ளார்.
செய்தியாளர்கள் மற்றும் பொதுமக்கள் மத்தியில் பேசிய திவ்யா சத்யராஜ், மேடை நாகரிகம் கருதி அந்த நபரின் முழுப் பெயரைத் தான் பொதுவெளியில் கூற விரும்பவில்லை என்றும், தற்போதைக்கு அவரை “மிஸ்டர் ஜே” என்று வைத்துக் கொள்ளலாம் என்றும் குறிப்பிட்டுக் குற்றச்சாட்டுகளை அடுக்கினார். சினிமாவில் பெரிய நடிகர்களுடன் நடிக்க வாய்ப்பு வாங்கித் தருவதாகக் கூறி, கிராமப்புறங்களில் இருந்து சென்னைக்கு வரும் ஏழை எளிய விளிம்புநிலை பெண்களின் வாழ்க்கையை இந்த ‘மாபியா கும்பல்’ திட்டமிட்டுச் சீரழித்து வருவதாக அவர் பகிரங்கமாகத் தெரிவித்தார்.
பாதிக்கப்பட்டவர்களில் தனது பேஷண்ட்டான (Patient) ஒரு பட்டியலின (தலித்) பெண் தற்பொழுது கடுமையான மன உளைச்சலுக்கு ஆளாகி, தனது எதிர்கால நம்பிக்கையை முழுமையாக இழந்து மீண்டும் தனது கிராமத்திற்கே தப்பி ஓடிவிட்டதாகத் திவ்யா சத்யராஜ் ஆவேசமாக விவரித்தார். “We need justice for Dalit girl” என்று உணர்ச்சிபொங்கக் கூறிய அவர், முதல்வர் விஜய்யின் வலதுகரமாகச் செயல்படும் இந்த மிஸ்டர் ஜே என்பவரால் இன்னும் ஏராளமான பெண்கள் பாதிக்கப்பட்டுள்ளதாகவும், இந்த அநியாயத்திற்கு எதிராகப் பெண்கள் தங்களது குரலைத் தொடர்ந்து உயர்த்த வேண்டும் என்றும் கேட்டுக் கொண்டார்.
திமுக ஆட்சிக் காலத்தில் அண்ணா பல்கலைக்கழகத்தில் ஒரு அசம்பாவிதம் நடந்தபோது அரசு எவ்வளவு விரைவாக நடவடிக்கை எடுத்தது என்பதைச் சுட்டிக்காட்டிய திவ்யா சத்யராஜ், தற்போதைய முதலமைச்சர் விஜய் எதற்கெடுத்தாலும் ‘ஹனிமூன் பீரியட்’ (Honeymoon Period) என்று கூறி தப்பித்து வருவதாகச் சாடினார். தவெக அரசு உடனடியாக இந்தச் சமூக ஊடக மாபியாக்களை ஒடுக்க வேண்டும் என்றும், பெண்களுக்கு எதிரான அத்துமீறல்களில் ஈடுபடும் ‘மிஸ்டர் ஜே’ உள்ளிட்ட அடியாட்கள் மீது கடுமையான சட்ட நடவடிக்கை எடுக்க வேண்டும் என்றும், அதுவரை புதிய அரசுக்கு எதிரான தங்களின் கேள்விகள் ஓயாது என்றும் அவர் அதிரடியாக எச்சரித்துள்ளார்.
