உக்ரைன் போரிலும், மத்திய கிழக்கு பிராந்தியத்தில் நிலவும் மோதல்களிலும் அமெரிக்காவின் வான் பாதுகாப்பு ஏவுகணைகள் பெருமளவில் பயன்படுத்தப்பட்டதால், அந்நாட்டின் ஏவுகணை கையிருப்பு வேகமாகச் சரிந்து வருகிறது. இந்த அச்சுறுத்தலைச் எதிர்கொள்ளும் வகையில், ‘பேட்ரியாட்’ (Patriot) மற்றும் ‘தாட்’ (THAAD) ரகத் தடுப்பு ஏவுகணைகளின் உற்பத்தியை அதிரடியாக உயர்த்த முன்னணி பாதுகாப்பு உற்பத்தி நிறுவனமான ‘லாக்ஹீட் மார்ட்டின்’ நிறுவனத்துடன் அமெரிக்க ராணுவம் $58.6 பில்லியன் டாலர் மதிப்பிலான மெகா ஒப்பந்தத்தில் கையெழுத்திட்டுள்ளது.
2026 முதல் 2032 வரையிலான 7 ஆண்டுகளைக் இலக்காகக் கொண்டு திட்டமிடப்பட்டுள்ள இந்த ஒப்பந்தம், அமெரிக்க வரலாற்றிலேயே வான் பாதுகாப்புத் துறையில் மேற்கொள்ளப்பட்ட மிகப்பெரிய ஒப்பந்தங்களில் ஒன்றாகக் கருதப்படுகிறது. இதன் மூலம் ஆண்டுக்கு 600 ஆக இருக்கும் பேட்ரியாட் ஏவுகணைகளின் உற்பத்தியை வரும் 2030-க்குள் 2,000 ஆக மும்மடங்கு உயர்த்தவும், ‘தாட்’ ரக ஏவுகணைகளின் உற்பத்தியை 4 மடங்கு வரை அதிகரிக்கவும் இலக்கு நிர்ணயிக்கப்பட்டுள்ளது.
உக்ரைன் மற்றும் இஸ்ரேல் ஆகிய நட்பு நாடுகளுக்குத் தொடர்ந்து வான் பாதுகாப்பு ஏவுகணைகளை வழங்கியதால், அமெரிக்கப் படைகளின் வசமிருந்த முக்கிய ஏவுகணைகளின் எண்ணிக்கை ஆபத்தான நிலைக்குக் குறைந்திருப்பதாக வாஷிங்டன் சர்வதேச ஆய்வு மையம் எச்சரித்திருந்தது. இந்த நிலைமையைக் கட்டுப்படுத்தவும், சொந்தப் படைகளின் ஆயுதக் கிடங்கைப் பலப்படுத்தவும் டொனால்ட் டிரம்ப் நிர்வாகம் உள்நாட்டுப் பாதுகாப்பு நிறுவனங்களுக்கு உற்பத்தியை உடனடியாகத் துரிதப்படுத்துமாறு அழுத்தம் கொடுத்து வருகிறது.
இந்த மெகா ஒப்பந்தத்தின் மூலம் லாக்ஹீட் மார்ட்டின் நிறுவனம் அமெரிக்காவின் ஆர்கன்சாஸ், அலபாமா போன்ற மாநிலங்களில் உள்ள தனது உற்பத்தி மையங்களை நவீனமயமாக்கி விரிவாக்கம் செய்யவுள்ளது. உலகளவில் அதிகரித்து வரும் போர்ச் சூழல்கள் மற்றும் வான்வழித் தாக்குதல் அச்சுறுத்தல்களுக்கு மத்தியில், அமெரிக்காவின் இந்த அதிரடி நடவடிக்கை சர்வதேச ராணுவ வர்த்தகத்தில் மிகப்பெரிய திருப்புமுனையாகப் பார்க்கப்படுகிறது.
