திருச்சி கிழக்கு சட்டமன்றத் தொகுதி இடைத்தேர்தல் களம், தற்போதைய ஆளும் கட்சியான தமிழக வெற்றிக் கழகத்திற்கும் (தவெக) பிரதான எதிர்க்கட்சியான திமுகவிற்கும் இடையே ஒரு மிகமுக்கியமான கௌரவப் பிரச்சினையாக (Prestige Issue) மாறியுள்ளது. கடந்த பொதுத்தேர்தலில் தவெக தலைவர் விஜய் இத்தொகுதியில் சுமார் 27,000 வாக்குகள் வித்தியாசத்தில் அபார வெற்றி பெற்றிருந்தார். அவர் தனது பேரம்பூர் தொகுதியைத் தக்கவைத்துக்கொண்டு திருச்சி கிழக்குத் தொகுதியை ராஜினாமா செய்ததை அடுத்து, இங்கு இடைத்தேர்தல் களம் சூடுபிடித்துள்ளது. தற்போது இத்தொகுதியில் தவெக சார்பில் கூப்ப கிருஷ்ணனின் மகன் சிரஞ்சீவி வேட்பாளராகக் களம் இறங்குவது உறுதியாகியுள்ள நிலையில், இரண்டு கட்சிகளும் தங்களின் தேர்தல் கணக்குகளைத் தீவிரமாக வகுக்கத் தொடங்கியுள்ளன.
ஆளும் கட்சியான தவெக, இடைத்தேர்தலில் தங்களின் பலத்தை நிரூபிக்க வேண்டிய கட்டாயத்தில் உள்ளது. கட்சியின் பொதுத்தேர்தல் வெற்றியின் போது தவெக தலைவர் விஜய் இங்கு பெற்ற 27,000 வாக்குகள் வித்தியாசத்தை விட, இந்த முறை கூடுதல் வாக்குகள் வித்தியாசத்தில் தவெக வேட்பாளர் சிரஞ்சீவி வெற்றி பெற வேண்டும் என்பதை ஒரு இலக்காகக் கொண்டு அக்கட்சியினர் களம் இறங்கியுள்ளனர். ஆளும் கட்சியின் மீதான செல்வாக்கு குறையவில்லை என்பதை நிரூபிக்கவும், திருச்சியைத் தங்களின் கோட்டையாகத் தக்கவைக்கவும் தீவிரமான தேர்தல் பணிகளைத் தவெகவினர் இப்போதே முடுக்கிவிட்டுள்ளனர்.
மறுபுறம், அறிவாலயத்தின் நேரடிப் பார்வையில் இந்த இடைத்தேர்தலை எதிர்கொள்ள திமுக வியூகம் வகுத்து வருகிறது. திருச்சி கிழக்கில் தவெக வெற்றி பெற்றாலும், அது மிகச் சொற்பமான வாக்குகள் வித்தியாசத்தில்தான் இருக்க வேண்டும் என்று திமுக கணக்கு போடுகிறது. குறிப்பாக, தவெகவின் வெற்றிக்கான வாக்கு வித்தியாசம் 1,000 அல்லது அதிகபட்சமாக 2,000 வாக்குகளுக்குள் மட்டுமே இருக்குமாறு சுருக்க வேண்டும் என்பது அறிவாலயத்தின் முக்கிய இலக்காக உள்ளது. இதன் மூலம் தவெகவின் அலை குறைந்துவிட்டதாகக் காட்ட முடியும் என்பது திமுகவின் அரசியல் கணக்காக இருக்கிறது.
வேட்பாளர் தேர்வைப் பொறுத்தவரை திமுக தரப்பில் கடும் போட்டி நிலவி வருகிறது. திமுக தலைமை இந்த உயர்மட்டப் போருக்கு முன்னாள் அமைச்சர் அன்பில் மகேஷை வேட்பாளராகக் களம் இறக்கத் திட்டமிட்டுள்ளதாகப் பேச்சுக்கள் எழுந்தாலும், உள்ளூர் அரசியல் வட்டாரத்திலும், பெரும்பாலான திமுக தலைவர்களின் சாய்ஸாகவும் முன்னாள் எம்.எல்.ஏ இனிகோ இருதயராஜ் தான் முதன்மைத் தேர்வாக இருக்கிறாராம். தொகுதி மக்களின் அறிமுகம் மற்றும் உள்ளூர் செல்வாக்கு காரணமாக அவரே பொருத்தமான வேட்பாளராக இருப்பார் என அக்கட்சியினர் நம்புகின்றனர்.
