அமெரிக்காவிற்கும் ஈரானுக்கும் இடையே கடந்த பிப்ரவரி முதல் சுமார் 110 நாட்களுக்கும் மேலாக நீடித்து வந்த மிகக் கொடூரமான போரை முடிவுக்குக் கொண்டு வரும் வரலாற்றுச் சிறப்புமிக்க முதற்கட்ட அமைதி ஒப்பந்தம் (MoU) கையெழுத்தாகியுள்ளது. பிரான்சின் எவியன்-லெ-பெய்ன்ஸ் நகரில் நடைபெற்ற ஜி7 உச்சிமாநாட்டில் பங்கேற்ற அமெரிக்க அதிபர் டொனால்ட் ட்ரம்ப் மற்றும் ஈரானிய அதிபர் மசூத் பெசெஷ்கியன் ஆகியோர் இந்த 14 அம்ச பூர்வாங்க உடன்படிக்கையில் டிஜிட்டல் முறையில் கையெழுத்திட்டுள்ளனர். உலகப் பொருளாதாரப் பேரழிவைத் தடுத்து, வளைகுடாப் பிராந்தியத்தில் அமைதியை மீட்டெடுக்கும் நோக்கில் இந்த அதிரடி நடவடிக்கை எடுக்கப்பட்டுள்ளது.
இந்த ஒப்பந்தத்தின் மிக முக்கிய அம்சமாக, உலகளாவிய கச்சா எண்ணெய் போக்குவரத்தின் முக்கிய நரம்பாகத் திகழும் ‘ஹார்முஸ் நீரிணை’ (Strait of Hormuz) உடனடியாக வணிகக் கப்பல்களின் போக்குவரத்துக்காகத் திறந்துவிடப்படும் என அறிவிக்கப்பட்டுள்ளது. போரின் காரணமாக இந்த நீரிணை மூடப்பட்டதால் உலகளவில் கச்சா எண்ணெய் விலை வரலாறு காணாத அளவுக்கு எகிறியது. தற்போது உடன்பாடு எட்டப்பட்டுள்ளதால், ஹார்முஸ் நீரிணையில் உள்ள கடற்படை முற்றுகைகள் மற்றும் கண்ணிவெடிகளை அகற்றும் பணிகள் அசுர வேகத்தில் தொடங்கப்பட்டு, எண்ணெய் கப்பல்கள் மீண்டும் பாதுகாப்பாக பயணிக்கத் தொடங்கியுள்ளன.
மேலும், போரினால் கடுமையாகப் பாதிக்கப்பட்டுள்ள ஈரானின் மறுசீரமைப்பு மற்றும் பொருளாதார வளர்ச்சிக்காக 300 பில்லியன் டாலர் (சுமார் 25 லட்சம் கோடி ரூபாய்) மதிப்பிலான பிரம்மாண்ட முதலீட்டுத் திட்டம் ஒன்றை உருவாக்க அமெரிக்காவும் அதன் பிராந்திய கூட்டாளி நாடுகளும் ஒப்புக்கொண்டுள்ளன. எனினும், இதில் அமெரிக்க வரிசெலுத்துவோரின் பணம் ஒரு சென்ட் கூட ஈரானுக்கு நேரடியாக வழங்கப்படாது என்றும், அரபு வளைகுடா நாடுகளின் முதலீடுகள் மற்றும் தனியார் சர்வதேச முதலீடுகள் மூலமாகவே இந்த நிதி திரட்டப்படும் என்றும் அமெரிக்கத் துணை அதிபர் ஜே.டி.வென்ஸ் தெளிவுபடுத்தியுள்ளார். இதற்குப் பதிலாக ஈரான் தனது அணுஆயுதத் தயாரிப்பு முயற்சிகளைக் கைவிட வேண்டும் என்ற நிபந்தனை விதிக்கப்பட்டுள்ளது.
போர் நிறுத்தம் தற்காலிகமாக அமலுக்கு வந்திருந்தாலும், இரு நாடுகளுக்கும் இடையே இன்னும் முழுமையான பரஸ்பர நம்பிக்கை ஏற்படவில்லை என்பதே உண்மை. ஒப்பந்தம் குறித்துப் பேசிய அதிபர் ட்ரம்ப், ஈரான் விதிகளை மீறினால் “அந்நாட்டின் மீது கடுமையான குண்டுவீச்சு நடத்தப்படும்” என பகிரங்கமாக எச்சரித்துள்ளார். மறுபுறம், ஈரானின் நாடாளுமன்ற சபாநாயகரும் முக்கிய பேச்சுவார்த்தையாளருமான முகமது பாகர் காலிபாஃப், அமெரிக்காவை தாங்கள் இன்னும் முழுமையாக நம்பவில்லை என்றும், ஈரானிய ராணுவத்தின் “விரல்கள் இன்னும் துப்பாக்கியின் விசை (Trigger) மீதே உள்ளன” என்றும் அதிரடியாகத் தெரிவித்துள்ளார். அடுத்த 60 நாட்களுக்குள் அணுசக்தி விவகாரங்கள் குறித்த இறுதி உடன்பாடு எட்டப்பட்ட பிறகே இப்பிராந்தியத்தில் நிரந்தர அமைதி திரும்புமா என்பது தெரியவரும்.
