தமிழ்நாட்டில் முதலமைச்சர் சி. ஜோசப் விஜய் தலைமையிலான தவெக ஆட்சியைச் சட்டமன்றத்தில் கவிழ்க்க முயன்றதாக எழுந்த ‘குதிரை பேரம்’ (Horse Trading) புகாரில், சென்னை மாநகரக் காவல்துறை தனது விசாரணையை அசுர வேகத்தில் முடுக்கிவிட்டுள்ளது. உத்தங்கரை தொகுதி தவெக எம்.எல்.ஏ டாக்டர் என். இளையராஜாவிடம் ரூ.35 கோடி பேரம் பேசிய வழக்கில் இடைத்தரகர்கள் 3 பேர் ஏற்கனவே கைது செய்யப்பட்டுள்ளனர். இந்த சதித்திட்டத்தின் பின்னணியில் முன்னாள் திமுக அமைச்சர் வி. செந்தில் பாலாஜி மற்றும் அவரது தம்பி வி. அசோக் குமார் ஆகியோர் இருப்பதாகக் காவல் துறையின் முதற்கட்ட செய்திக்குறிப்பில் தெரிவிக்கப்பட்டுள்ளதால், செந்தில் பாலாஜி எந்த நேரத்திலும் கைது செய்யப்படலாம் என்ற பரபரப்பு கோட்டை வட்டாரத்தில் நிலவி வருகிறது.
தமிழக அரசியல் களத்தில் தற்பொழுது இந்த வழக்கு மிகப்பெரிய அதிர்வலைகளை ஏற்படுத்தக் காரணம், அடுத்த சில நாட்களில் முதலமைச்சர் விஜய் மேற்கொள்ளவிருக்கும் கரூர் மாவட்டப் பயணம் தான். கடந்த 2025 செப்டம்பர் மாதம் கரூரில் நடைபெற்ற தவெக கூட்ட நெரிசல் விபத்தில் பலியான 41 பேரின் குடும்பங்களைச் சந்தித்து ஆறுதல் கூறவும், அரசு நலத்திட்ட உதவிகளை வழங்கவும் ஜூலை 10 மற்றும் 11 ஆகிய தேதிகளில் முதலமைச்சர் விஜய் கரூர் செல்லத் திட்டமிட்டுள்ளார். செந்தில் பாலாஜியின் அரசியல் கோட்டையாகக் கருதப்படும் கரூருக்கு விஜய் காலடி எடுத்து வைப்பதற்கு முன்பாகவே, இந்த பேரம் பேசும் வழக்கில் பாலாஜியைச் சிறையில் அடைக்கத் தவெக அரசு தீவிரமாக காய நகர்த்தி வருவதாக உளவுத்துறை வட்டாரங்கள் தெரிவிக்கின்றன.
மறுபுறம், இந்த விவகாரத்தில் திமுக தரப்பும் தவெகவிற்குப் பதிலடி கொடுக்கத் தீவிர சட்ட நடவடிக்கைகளில் இறங்கியுள்ளது. தவெக அரசு பிற கட்சிகளின் எம்.எல்.ஏ-க்களை இழுத்துத் தங்களின் பெரும்பான்மையைத் தக்கவைக்க முயல்வதாகக் குற்றம் சாட்டி, லஞ்ச ஒழிப்புத் துறை (DVAC) மற்றும் ஆளுநரிடம் திமுக புகார் அளித்துள்ளது. ஆனால், இந்த அரசியல் புகார்களுக்கு முற்றுப்புள்ளி வைக்கும் விதமாக, தவெக அரசு தனது அதிகார பலத்தைப் பயன்படுத்தி முறையான டிஜிட்டல் மற்றும் போன் கால் ஆதாரங்களுடன் (CDR) செந்தில் பாலாஜியைச் சுற்றியுள்ள வளையத்தை இறுக்கி வருகிறது. இதன் மூலம் சட்டம்-ஒழுங்கு மற்றும் ஊழல் தடுப்பு நடவடிக்கைகளில் திமுகவை முந்திக்கொண்டு தவெக தங்களின் அதிரடிப் பாய்ச்சலைக் காட்டி வருகிறது.
கடந்த காலங்களில் ஓராண்டுக்கும் மேலாகச் சிறையில் இருந்து ஜாமீனில் வெளிவந்த செந்தில் பாலாஜிக்கு, தற்போது தவெக எம்.எல்.ஏ-க்களைக் கலைக்க முயன்றதாகப் பதிவாகியுள்ள இந்த புதிய வழக்கு மேலும் ஒரு சட்ட நெருக்கடியை உருவாக்கியுள்ளது. கரூரில் இரு கட்சிகளுக்கும் இடையே ஏற்கனவே அரசியல் அனல் பறந்து வரும் வேளையில், இந்த கைது நடவடிக்கை அரங்கேறினால் அது தமிழக அரசியலில் மிகப்பெரிய திருப்பமாக அமையும் என்பதில் சந்தேகமில்லை.
