சென்னை அடுத்த மாமல்லபுரத்தில் நடைபெற்ற தமிழக வெற்றிக் கழகத்தின் (தவெக) பிரம்மாண்ட இணைப்பு விழாவில், அக்கட்சியில் புதிய வரவாக இணைந்துள்ள முன்னாள் அதிமுக அமைச்சர் சி. விஜயபாஸ்கர் பேசிய பேச்சு மேடையில் இருந்த தவெகவின் மூத்த அமைச்சர்கள் மற்றும் நிர்வாகிகளிடையே திடீர் சலசலப்பையும், முக மாற்றத்தையும் ஏற்படுத்தியுள்ளது. மாநாட்டைப் போன்ற பிரம்மாண்ட சூழலில் திரண்டிருந்த பல்லாயிரக்கணக்கான தொண்டர்கள் மத்தியில் பேசிய சி. விஜயபாஸ்கர், “இங்கே கூடியிருக்கும் இந்த மாபெரும் கூட்டம் என்பது வெறும் ‘ட்ரைலர்’ (Trailer) தான்; உண்மையான ‘மெயின் பிக்சரை’ (Main Picture) நாங்கள் டெல்டா மண்ணில் காட்டப் போகிறோம்” என்று மைக் பிடித்து அதிரடியாக முழங்கினார்.
புதுக்கோட்டை, திருச்சி, தஞ்சாவூர் உள்ளிட்ட டெல்டா மாவட்டங்களில் இருந்து சுமார் 20,000-க்கும் மேற்பட்ட தொண்டர்களைத் திரட்டி வந்து தவெகவில் இணைத்துள்ள சி. விஜயபாஸ்கர், தவெக பொதுச்செயலாளர் ஆதவ் அர்ஜுனாவிடம் மேடையிலேயே ஒரு முக்கியக் கோரிக்கையை வைத்தார். “பொதுச்செயலாளர் அவர்களே, நீங்கள் தலைமையிடம் முறைப்படி அனுமதி வாங்கித் தாருங்கள்; அடுத்த சில வாரங்களிலேயே ஒட்டுமொத்த தமிழ்நாடே திரும்பிப் பார்க்கும் வகையில், டெல்டா மண்ணில் இதைவிடப் பல மடங்கு பிரம்மாண்டமான இரண்டாவது மாபெரும் இணைப்பு விழாவை நாங்கள் நடத்திக் காட்டுகிறோம்” என்று பகிரங்கமாகச் சவால் விடுத்தார்.
அதிமுகவில் இருந்து விலகி, தனது விராலிமலை சட்டமன்ற உறுப்பினர் பதவியையும் ராஜினாமா செய்துவிட்டு தவெகவில் இணைந்த முதல் நாளே, கட்சியின் மூத்த நிர்வாகிகளைக் கலந்தாலோசிக்காமல் அடுத்த பிரம்மாண்ட விழா மற்றும் அதற்கான ‘ரூட் மேப்’ (Route Map) குறித்து விஜயபாஸ்கர் தன்னிச்சையாக மேடையில் அறிவித்தது அங்கிருந்த தவெக அமைச்சர்களுக்கு அதிர்ச்சியை அளித்துள்ளது. ஏற்கனவே கட்சியில் நீண்ட நாட்களாக உழைத்து வரும் சீனியர் தலைவர்கள் மற்றும் அமைச்சர்களைத் தாண்டி, புதிதாக வந்த ஒரு மாற்றுக்கட்சித் தலைவர் அசுர வேகத்தில் மேடையைக் கைப்பற்றி அடுத்தகட்ட அரசியல் நகர்வுகளைத் தீர்மானிப்பது போல் பேசியதே அமைச்சர்களின் முகம் மாறியதற்குக் காரணம் என அரசியல் வட்டாரத்தில் பேசப்படுகிறது.
இருப்பினும், புதுக்கோட்டை மற்றும் டெல்டா மண்டலங்களில் அதிமுகவின் வாக்கு வங்கியை முற்றிலுமாகச் சரித்து, அங்கு தவெகவை அசுர பலத்துடன் கட்டமைக்கத் தான் முழுமையாகத் தயாராக உள்ளதாக சி. விஜயபாஸ்கர் விடுத்த இந்த நேரடி முழக்கம் தொண்டர்களிடையே பெரும் உற்சாகத்தை ஏற்படுத்தியுள்ளது. தவெக தலைவர் முதலமைச்சர் சி. ஜோசப் விஜய்யின் ஒற்றைத் தலைமையின் கீழ் தங்களின் அரசியல் பயணம் கட்டுக்கோப்புடன் தொடரும் என்று அவர் தெளிவுபடுத்திய போதிலும், இந்த ‘ட்ரைலர் – மெயின் பிக்சர்’ சர்ச்சை மற்றும் மேடை நிர்வாகக் குளறுபடிகள் தவெகவின் உட்கட்சி அரசியலில் புதிய விவாதங்களை இப்போதே கிளப்பத் தொடங்கியுள்ளன.
