முதலமைச்சர் சி. ஜோசப் விஜய் தலைமையிலான தவெக அரசுக்கு எதிராகப் பதிவாகியுள்ள ‘குதிரை பேரம்’ (Horse Trading) புகார்கள் குறித்துத் திமுக முன்னாள் சட்டமன்ற உறுப்பினர் தாயகம் கவி பரந்தாமன் தற்பொழுது கடுமையான விமர்சனங்களை முன்வைத்துள்ளார். தவெக எம்.எல்.ஏ டாக்டர் என். இளையராஜாவிடம் ரூ.35 கோடி பேரம் பேசப்பட்ட வழக்கில் முன்னாள் திமுக அமைச்சர் வி. செந்தில் பாலாஜி மற்றும் அவரது தம்பியின் பெயர் சேர்க்கப்பட்டு, இடைத்தரகர்கள் கைது செய்யப்பட்டுள்ளதை அவர் திட்டவட்டமாக மறுத்துள்ளார். தவெக அமைச்சர் ஆர். நிர்மல் குமார் திமுக மீது சுமத்தியுள்ள குற்றச்சாட்டுகள் அனைத்தும் வடிகட்டிய பொய்கள் என்றும், இது தங்களின் பலவீனத்தை மறைக்கத் தவெக நடத்தும் நாடகம் என்றும் சாடியுள்ளார்.
செய்தியாளர்களைச் சந்தித்த பரந்தாமன், தற்போதைய தவெக அரசின் பலம் குறித்த புள்ளிவிவரங்களை (Data) அடுக்கிப் பரபரப்பைக் கிளப்பினார். “மாண்புமிகு விஜய் அவர்களின் அரசு என்பது 150 அல்லது 160 தொகுதிகளில் வென்ற இமாலய சாதனை படைத்த பலமான ஆட்சி அல்ல; அது வெறும் 108 இடங்களில் மட்டுமே வென்ற ஒரு மைனாரிட்டி அரசு. அதில் ஒரு தொகுதி ராஜினாமாவால் 107 ஆகக் குறைந்து, நீதிமன்றத் தடையால் மற்றுமொரு எம்.எல்.ஏ வாக்குரிமையை இழந்ததால் தற்பொழுது 106 ஆக மாறியுள்ளது. சபாநாயகரின் ஒரு வாக்கையும் சேர்த்தால் வெறும் 105 இடங்களை மட்டுமே வைத்துக் கொண்டுள்ள இந்த அரசு, ஏதோ எஃகு கோட்டையில் இருப்பது போலவும், அதைத் திமுக கவிழ்க்க சதி செய்வது போலவும் நகைச்சுவை செய்து வருகிறார்கள்” என்று அவர் சுட்டிக்காட்டினார்.
தவெக அரசை ஒரு பலமான கட்டமைப்புடன் ஒப்பிட முடியாது என்று விமர்சித்த அவர், “விஜய் அரசு என்பது தற்பொழுது ஒரு சீட்டுக்கட்டு போலத்தான் இருக்கிறது. பலமான காற்று அடித்தால் கூடத் தாங்காமல் சரிந்துவிடும் நிலையில் இருக்கும் இந்த அரசைத் திமுக கவிழ்க்க வேண்டிய அவசியமே இல்லை; அரசியல் புரிதல் உள்ள பாமர மக்களுக்குக் கூட இந்த ஆட்சி எப்போது வேண்டுமானாலும் கவிழலாம் என்பது நன்றாகவே தெரியும். உண்மையான குதிரை பேரத்தில் ஈடுபடுவது தவெக தான். கடந்த மே 4 ஆம் தேதி தேர்தல் முடிவுகள் வெளியானதில் இருந்து மே 10 ஆம் தேதி பதவி ஏற்கும் வரை தங்களின் பலத்தை அதிகரிக்க அவர்கள் எத்தனையோ பேரங்களை நடத்தினார்கள் என்பது தான் உண்மை” என்று குற்றம் சாட்டினார்.
திமுக மீது பழி சுமத்துவதைத் தவெக உடனடியாக நிறுத்த வேண்டும் என்று வலியுறுத்திய பரந்தாமன், கடந்த மே 7 ஆம் தேதி ஆமுகா (AMMK) கட்சியின் சட்டமன்ற உறுப்பினரை முகம் மூடிய நிலையில் இன்னோவா காரில் அழைத்துச் சென்று பேரம் நடத்திய உண்மை குறித்து முதலமைச்சர் விஜய் இதுவரை ஏன் வாய் திறக்கவில்லை என்று கேள்வி எழுப்பியுள்ளார். தங்களது கட்சியின் எம்.எல்.ஏ கடத்தப்பட்டதாகவும், கையெழுத்து போலியாகப் பயன்படுத்தப்பட்டதாகவும் டிடிவி தினகரன் காவல் நிலையத்தில் கொடுத்த புகாரை இதுவரை தவெக அரசு பதிவு செய்யவில்லை என்றும் அவர் சாடினார். தங்களின் உட்கட்சி அச்சத்தை மறைக்க, திமுகவின் முன்னாள் அமைச்சர் செந்தில் பாலாஜிக்குத் தொடர்பு இருப்பதாகக் கூறி 6 பேரை மேலும் கைது செய்து தவெகவினர் நாடகம் ஆடுவதாகத் தனது பேட்டியில் அவர் காட்டமாகத் தெரிவித்துள்ளார்.
