அமெரிக்க மற்றும் இஸ்ரேலிய கூட்டு வான்வழித் தாக்குதலில் கொல்லப்பட்ட ஈரானின் உச்சத் தலைவர் அயதுல்லா அலி கமேனியின் (Ali Khamenei) இறுதி ஊர்வலம் தலைநகர் டெஹ்ரானில் பல லட்சம் மக்கள் பங்கேற்புடன் இன்றும் தகிக்கும் பதற்றத்துடன் நீடித்து வருகிறது. இந்த இறுதிச்சடங்கு நிகழ்வில் பங்கேற்ற ஈரானிய தீவிர ஆதரவாளர்கள் மற்றும் இஸ்லாமிய புரட்சிகர காவல்படை (IRGC) பிரிவினர், அமெரிக்க அதிபர் டொனால்ட் டிரம்பைக் குறிவைத்து பழிவாங்கப் போவதாக பகிரங்கமாக முழக்கமிட்டுள்ளனர். “இனி இரத்தம் தான் பதிலடி” (There will be blood) என்ற வாசகங்கள் அடங்கிய பேனர்களைத் ஏந்தியவாறு, டிரம்பை படுகொலை செய்யப் போவதாக அவர்கள் சூளுரைத்துள்ளது சர்வதேச அளவில் பெரும் அதிர்ச்சியை ஏற்படுத்தியுள்ளது.
தலைநகர் டெஹ்ரானில் கமேனியின் உடல் வைக்கப்பட்டிருந்த வாகனத்தின் முன்பாக, அமெரிக்க அதிபர் டொனால்ட் டிரம்ப் மற்றும் இஸ்ரேல் பிரதமர் பெஞ்சமின் நெதன்யாகு ஆகியோரின் முகங்களில் துப்பாக்கி இலக்கு (Crosshairs) குறிவைக்கப்பட்ட ராட்சத போஸ்டர்களைக் கூட்டத்தினர் ஏந்திச் சென்றனர். அதில் ஆங்கிலத்தில், “டிரம்பைக் கொல்லுங்கள் – $100 மில்லியன் டாலர் ஈரானிய பரிசுத் தொகை” (Kill Trump – $100 Million Iranian Bounty) என்று எழுதப்பட்டிருந்ததுடன், டிரம்பின் உருவ பொம்மையைத் தூக்கிலிட்டும், அவரது போஸ்டர்கள் மீது கற்களை வீசி எறிந்தும் தங்களின் கடுமையான கோபத்தை வெளிப்படுத்தினர்.
ஒருபுறம் வான்வெளியில் இருந்து பூமியின் வளிமண்டலம் வரை பதற்றம் நிலவ, மற்றொருபுறம் போர் நிறுத்தத்தை எட்டுவதற்கும் ஹார்முஸ் ஜலசந்தியை மீண்டும் திறப்பதற்கும் பாகிஸ்தான் மற்றும் கத்தார் நாடுகளின் மத்தியஸ்தத்துடன் தோஹாவில் அமெரிக்கா-ஈரான் இடையே ரகசியப் பேச்சுவார்த்தைகள் (US-Iran Negotiations) ஒரு நேர்மறையான பாதையில் நகர்ந்து வருகின்றன. ஆனால், இந்தத் தூதரக முயற்சிகளுக்குத் தீவிர முட்டுக்கட்டை போடும் வகையில், டெஹ்ரான் மெட்ரோ ரயில் நிலையங்கள் மற்றும் இறுதிச்சடங்கு மைதானங்களில் கூடியிருந்த லட்சக்கணக்கான மக்கள், “எங்களுக்கு எந்த ஒரு சமரச ஒப்பந்தமும் வேண்டாம்; எங்களுக்குக் கொலைகார டிரம்பின் தலை மட்டும்தான் வேண்டும்!” என்று ஆக்ரோஷமாக முழக்கமிட்டு வருகின்றனர்.
ஈரானில் தற்போது புதிய உச்சத் தலைவராகப் பொறுப்பேற்றுள்ள மொஜ்தாபா கமேனி, பாதுகாப்பு அச்சுறுத்தல்கள் காரணமாக இந்த இறுதி ஊர்வலத்தில் நேரில் தோன்றாத நிலையில், ஈரானிய ராணுவ செய்தித் தொடர்பாளர் அமீர் அக்ராமினியா தங்களுக்குக் கிடைத்துள்ள இந்த போர் நிறுத்தக் கால அவகாசத்தைத் தங்களின் போர்த் திறனை மேம்படுத்தப் பயன்படுத்தி வருவதாகக் கூறியுள்ளார். மேலும், ஈரானின் இலக்குகள் அனைத்தும் புதுப்பிக்கப்பட்டுள்ளதாகவும், எதிரிகளின் எந்தவொரு தாக்குதலுக்கும் முன்னெப்போதையும் விட மிகக் கொடூரமான பதிலடி கொடுக்கப்படும் என்றும் அவர் எச்சரித்துள்ளது மத்திய கிழக்கு பிராந்தியத்தில் போர் மேகங்களை மேலும் சுழன்றடிக்கச் செய்துள்ளது.
