சிவகங்கை மாவட்டம் நிரஞ்சான் பகுதியில் உள்ள அரசுப் பள்ளி ஒன்றில், சக மாணவனுக்கு இடையே ஏற்பட்ட தனிப்பட்ட முன்விரோதம் காரணமாக வகுப்பறையிலேயே கத்திக்குத்து சம்பவம் அரங்கேறியுள்ளது ஒட்டுமொத்த தமிழகத்தையும் அதிர்ச்சியில் ஆழ்த்தியுள்ளது. 12 ஆம் வகுப்பு படித்து வரும் மாணவர் ஒருவரை, அதே வகுப்பில் பயிலும் திருமுருகன் என்ற சக மாணவன் சகதித் தாளாமல் கத்தியால் கொடூரமாகக் குத்தியுள்ளான். இன்று காலை பள்ளி தொடங்கிய சில நிமிடங்களிலேயே இந்த விபரீத வன்முறைச் சம்பவம் வகுப்பறையிலேயே சக மாணவர்கள் கண்முன்னே நிகழ்ந்துள்ளது.
கத்திக்குத்தில் பலத்த காயமடைந்த அந்த மாணவன், உடனடியாக மீட்கப்பட்டு அருகில் உள்ள அரசு மருத்துவமனையில் அவசரச் சிகிச்சைப் பிரிவில் அனுமதிக்கப்பட்டுள்ளான். அங்கு அவனுக்கு மருத்துவர்கள் தீவிர சிகிச்சை அளித்து வருகின்றனர். மருத்துவமனையில் சிகிச்சையில் இருக்கும் மாணவனிடம் போலீசார் நடத்திய ஆரம்பகட்ட விசாரணையில், தாக்குதல் நடத்திய மாணவன் திருமுருகன் தனது கையிலேயே எப்போதும் கத்தியை மறைத்து வைத்திருந்ததாகப் பாதிக்கப்பட்ட மாணவன் வாக்குமூலம் அளித்துள்ளான்.
இந்தக் கொடூரத் தாக்குதலுக்கான காரணம் குறித்து விசாரித்தபோது, மாணவர்களுக்கிடையே இருந்த தனிப்பட்ட பகையும் ஈகோவுமே இதற்குக் காரணம் எனத் தெரியவந்துள்ளது. “அவன் என்னை சும்மா போறப்போ அடிச்சான், அந்த ஆத்திரத்திலும் கோபத்திலும் தான் நான் கத்தியை எடுத்து அவனோட நெஞ்சுப் பகுதியில குத்தினேன்” எனத் தாக்குதல் நடத்திய மாணவன் போலீசாரிடம் திடுக்கிடும் வாக்குமூலம் அளித்துள்ளதாகத் தகவல்கள் வெளியாகியுள்ளன. சிறுபிள்ளைத்தனமான மோதலில் கத்திக்குத்து வரை சென்ற சம்பவம் ஆசிரியர்களை உறைக்க வைத்துள்ளது.
பள்ளி வளாகங்களுக்குள் மாணவர்கள் ஆயுதங்களை எடுத்து வருவதும், வகுப்பறையிலேயே இத்தகைய வன்முறைகளில் ஈடுபடுவதும் அண்மைக்காலமாக அதிகரித்து வருவது பெற்றோர் மற்றும் சமூக ஆர்வலர்களிடையே பெரும் கவலையை ஏற்படுத்தியுள்ளது. இந்தச் சம்பவம் தொடர்பாகத் தீவிர வழக்குப் பதிவு செய்துள்ள சிவகங்கை மாவட்டப் போலீசார், தாக்குதல் நடத்திய மாணவனிடம் தொடர்ந்து விசாரணை நடத்தி வருகின்றனர். மேலும், பள்ளி நிர்வாகம் சார்பிலும் இது தொடர்பாகக் கடுமையான ஒழுங்கு நடவடிக்கை எடுக்கப் பரிந்துரைக்கப்பட்டுள்ளது.
