அயர்லாந்தில் கத்தோலிக்கத் திருச்சபையால் நடத்தப்பட்டு வந்த முன்னாள் ‘தாயும் சேயும் காப்பக’ (Mother and Baby Home) வளாகத்தில் மேற்கொள்ளப்பட்டு வரும் தொல்லியல் அகழ்வாராய்ச்சியில், மேலும் 22 குழந்தைகளின் உடல்கள் மற்றும் எலும்புக் கூடுகள் கண்டெடுக்கப்பட்டுள்ளது பெரும் அதிர்ச்சியை ஏற்படுத்தியுள்ளது. அயர்லாந்தின் கால்வே (Co Galway) மாகாணத்தில் உள்ள ‘டூவாம்’ (Tuam) நகரில் அமைந்திருந்த இந்த இல்லத்தின் வளாகத்தில் கடந்த ஒரு ஆண்டாக நடைபெற்று வரும் போரன்சிக் அகழ்வாராய்ச்சியில், இதுவரை கண்டெடுக்கப்பட்ட பிஞ்சுக் குழந்தைகளின் உடல்களின் எண்ணிக்கை 99 ஆக உயர்ந்துள்ளது.
டூவாம் நகரில் இயங்கி வந்த ‘செயின்ட் மேரிஸ்’ தாயும் சேயும் காப்பகம் 1925 முதல் 1961 வரையிலான காலகட்டத்தில் போன் செகோர்ஸ் (Bon Secours) கத்தோலிக்கக் கன்னியாஸ்திரிகளால் இயக்கப்பட்டு வந்தது. திருமணத்திற்கு முன்பாகக் கர்ப்பமடையும் பெண்கள் மற்றும் அவர்களின் குழந்தைகள் சமூகப் பழியிலிருந்து ஒதுக்கி வைக்கப்பட்டு இந்த இல்லத்தில் பராமரிக்கப்பட்டனர். இக்காலகட்டத்தில் நோயினாலும் ஊட்டச்சத்து குறைபாட்டினாலும் உயிரிழந்த சுமார் 796 குழந்தைகள், எந்தவித மனிதநேயமுமின்றி அங்கிருந்த கழிவுநீர் தொட்டிகளிலும் அடையாளமற்ற புதைமேடுகளிலும் தூக்கி வீசப்பட்ட கொடூரம் வரலாற்று ஆய்வாளர் கேத்ரின் கோர்லெஸ் என்பவரால் வெளிச்சத்திற்கு வந்தது.
கடந்த 2025 ஜூலை முதல் டூவாம் தளத்தில் அரசு நிதியுதவியுடன் அதிநவீன போரன்சிக் தொழில்நுட்பங்கள் மூலம் அகழ்வாராய்ச்சிப் பணிகள் நடைபெற்று வருகின்றன. தற்போது கண்டெடுக்கப்பட்ட 22 குழந்தைகளின் உடல்களும், வாகனங்கள் செல்லும் பாதையாகப் பயன்படுத்தப்பட்ட தார் மற்றும் சரளைக் கற்களுக்கு அடியில் மரப்பெட்டிகளில் (Coffins) புதைக்கப்பட்ட நிலையில் கண்டெடுக்கப்பட்டுள்ளன. மேற்பரப்பில் எவ்வித அடையாளமும் இல்லாத வகையில் புதைக்கப்பட்ட இந்த உடல்களை மீட்டுப் பரிசோதிக்கும் பணிகளை ‘டூவாம் அங்கீகரிக்கப்பட்ட தலையீட்டு இயக்குநர் அலுவலகம்’ (ODAIT) தீவிரமாக முன்னெடுத்து வருகிறது.
கண்டெடுக்கப்பட்ட குழந்தைகள் மற்றும் சிறார்களின் எலும்புக் கூடுகளில் இருந்து இதுவரை 62 டி.என்.ஏ (DNA) மாதிரிகள் சேகரிக்கப்பட்டு, பாதிக்கப்பட்ட குடும்பத்தினரின் மாதிரிகளுடன் ஒப்பிடும் ஆய்வுகள் துரிதப்படுத்தப்பட்டுள்ளன. அயர்லாந்து வரலாற்றில் கத்தோலிக்கக் காப்பகங்களில் நிகழ்ந்த இந்த மனித உரிமை மீறல்கள் மற்றும் குழந்தைகள் மரணங்கள் குறித்த உண்மைகளை வெளிக்கொணர்ந்து, உயிரிழந்த பிஞ்சுக் குழந்தைகளுக்குத் தகுந்த மரியாதையுடன் இறுதி அஞ்சலி செலுத்திப் புதைக்க அயர்லாந்து அரசு நடவடிக்கை எடுத்து வருகிறது.
