தென்மேற்கு ஐரோப்பிய நாடுகளான ஸ்பெயின் மற்றும் பிரான்சில் முன்னெப்போதும் இல்லாத வகையில் காட்டுத்தீ விஸ்வரூபம் எடுத்துள்ளதால், ஸ்பெயின் அரசு தனது வரலாற்றிலேயே முதன்முறையாகக் காட்டுத்தீப் பேரிடருக்காக தேசிய அவசரநிலையை (National Emergency) பிரகடனம் செய்துள்ளது. அதேவேளையில், பிரான்சின் அட்லாண்டிக் கடற்கரைப் பகுதியில் காட்டுத்தீ கட்டுப்பாடின்றிப் பரவி வருவதால், சுற்றுலாப் பயணிகள் மற்றும் பொதுமக்கள் உட்பட 80,000-க்கும் மேற்பட்டோர் வீடுகளை விட்டு வெளியேற்றப்பட்டுள்ளனர்.
ஸ்பெயின் தலைநகர் மாட்ரிட் மற்றும் அதன் அண்டை மாகாணமான அவிலா (Ávila) ஆகிய பகுதிகளில் பல இடங்களில் பற்றியெரிந்த காட்டுத்தீ ஒன்றாக இணைந்து பிரம்மாண்டமாக உருவெடுத்துள்ளது. 44 டிகிரி செல்சியஸ் வரையிலான கடுமையான வெப்ப அலை மற்றும் சுழன்றடிக்கும் பலத்த காற்றினால் தீ அதிவேகமாகப் பரவி வருவதால், மாட்ரிட் பகுதியிலிருந்து மட்டும் சுமார் 20,000 பேர் பாதுகாப்பான இடங்களுக்கு வெளியேற்றப்பட்டுள்ளனர். அம்மாநில உள்துறை அமைச்சகம் நேரடியாக மீட்புப் பணிகளைக் கட்டுப்படுத்தி, ராணுவப் படைகளையும் களத்தில் இறக்கியுள்ளது.
மறுபுறம், பிரான்சின் பிரபல சுற்றுலாத் தலமான ‘கபே பெரெட்’ (Cap Ferret) தீபகற்பப் பகுதியில் காட்டுத்தீ குடியிருப்புகளைச் சூழ்ந்ததால் அங்குப் பெரும் பீதி ஏற்பட்டது. ஒரே சாலையில் வாகன நெரிசல் ஏற்பட்டதால், காவல்துறையினரும் மீட்புக் குழுவினரும் சுமார் 1,500-க்கும் மேற்பட்டோரை படகுகள் மற்றும் கடல்சார் டாக்சிகள் மூலம் அட்லாண்டிக் கடல் வழியே பத்திரமாக மீட்டு அர்காச்சான் (Arcachon) நகருக்குக் கொண்டு சேர்த்தனர். பிரான்சின் ஜிரோண்டே மற்றும் லாண்டேஸ் மாகாணங்களில் மட்டும் 67,000-க்கும் அதிகமானோர் வெளியேற்றப்பட்டுள்ளனர்.
தீயின் வீரியத்தைக் கட்டுப்படுத்த இரு நாடுகளின் தீயணைப்புப் படைகளும் திணறி வரும் சூழலில், ஸ்பெயின் மற்றும் பிரான்ஸ் ஆகிய இரு நாடுகளும் ‘ஐரோப்பிய ஒன்றியத்தின் சிவில் பாதுகாப்பு அமைப்பின்’ (EU Civil Protection Mechanism) அவசர உதவியைக் கோரியுள்ளன. இதனைத் தொடர்ந்து குரோஷியா, போர்ச்சுகல், இத்தாலி, கிரீஸ் மற்றும் ஸ்லோவாக்கியா ஆகிய உறுப்பு நாடுகள் அதிநவீன கனடாஎர் (Canadair) தீயணைப்பு விமானங்கள் மற்றும் பிளாக் ஹாக் (Black Hawk) ஹெலிகாப்டர்களைத் தீயணைப்புப் பணிகளுக்காக உடனடியாக அனுப்பி வைத்துள்ளன.
