ஈரானின் நிலத்தடி அணுசக்தி மையங்களில் பாதுகாப்பாகச் சேமித்து வைக்கப்பட்டுள்ள செறிவூட்டப்பட்ட யுரேனியக் கையிருப்பைக் கைப்பற்ற அல்லது அடியோடு அழித்து ஒழிக்க, ராணுவ வரலாற்றிலேயே இல்லாத அளவிற்குப் பிரம்மாண்டமான மற்றும் அதிநவீனக் கமாண்டோ நடவடிக்கையை (Special Forces Operation) அமெரிக்கா தீவிரமாகப் பரிசீலித்து வருகிறது. ‘ஜாயிண்ட் ஸ்பெஷல் ஆபரேஷன்ஸ் கமாண்ட்’ (JSAC) கட்டுப்பாட்டில் உள்ள கடற்படையின் சீல்ஸ் (Navy SEALs) மற்றும் ராணுவத்தின் ரேஞ்சர்ஸ் படைகளை ஈரானின் ரகசிய அணு மையங்களுக்குள் இறக்கி இந்த ஆபரேஷனைச் செயல்படுத்த அமெரிக்கப் பாதுகாப்புத்துறைத் தலைமையகமான பென்டகன் வியூகம் வகுத்து வருகிறது.
ஈரானின் போர்டோ (Fordow), நடான்ஸ் (Natanz) மற்றும் இஸ்ஃபஹான் (Isfahan) ஆகிய பகுதிகளில் பூமிக்கு அடியில் பல அடிகள் ஆழத்தில் கட்டப்பட்டுள்ள பலத்த பாதுகாப்புமிக்க சுரங்கங்களுக்குள் ஆயிரக்கணக்கான கிலோ கிராம் எடையுள்ள யுரேனியம் வைக்கப்பட்டுள்ளது. இவற்றை வெளியேற்ற அல்லது அழிக்க வேண்டுமானால், ஆயிரத்திற்கும் மேற்பட்ட சிறப்புப் படை வீரர்களை ஈரானிய எல்லைக்குள் இறக்கி, சுரங்கங்களின் நுழைவாயில்களைத் தகர்த்து, கண்ணிவெடிகளை அகற்றி, வான்வழிப் பாதுகாப்பு வளையத்தை உருவாக்கிப் போராட வேண்டியிருக்கும் என ஓய்வுபெற்ற அமெரிக்கக் கடற்படை அட்மிரல் ஜேம்ஸ் ஸ்டாவ்ரிடிஸ் எச்சரித்துள்ளார்.
சுமார் 60 சதவீதம் வரை தூய்மையாக்கப்பட்ட யுரேனியத்தைக் கைப்பற்றி விமானம் மூலமாக அமெரிக்காவிற்கு எடுத்துச் செல்வது அல்லது அந்த இடத்திலேயே வைத்து அதை முழுமையாக வீரியமிழக்கச் செய்வது ஆகிய இரு வழிகள் ஆராயப்பட்டு வருகின்றன. இருப்பினும், ஈரான் அணு உலையைச் சுற்றி வெடிமருந்துகளையும் கண்ணிவெடிகளையும் அமைத்துத் தற்காப்பைத் தீவிரப்படுத்தியுள்ளதால், அமெரிக்கப் படைகள் உள்ளே நுழையும் பட்சத்தில் கதிர்வீச்சுப் பெரு ஆபத்து ஏற்படுவதோடு, இரு நாடுகளுக்கும் இடையே பெரும் போர் மூளும் அபாயமும் நிலவுகிறது.
அமெரிக்க அதிபர் டொனால்ட் டிரம்ப் நிர்வாகம் இந்த ஆபரேஷனுக்கு இன்னும் இறுதி ஒப்புதல் அளிக்கவில்லை என்ற போதிலும், ராஜதந்திரப் பேச்சுவார்த்தைகள் தோல்வியடையும் பட்சத்தில் இந்தத் தீவிர ராணுவ நடவடிக்கை மட்டுமே ஈரானின் அணுஆயுதக் கனவைத் தகர்க்க ஒரே வழி என அமெரிக்கப் பாதுகாப்பு ஆலோசகர்கள் தெரிவித்துள்ளனர். மனித வரலாற்றிலேயே மிகச் சிக்கலான மற்றும் அபாயகரமான இந்த “மின்னல் வேக கமாண்டோ தாக்குதல்” பற்றிய செய்திகள், மத்திய கிழக்குப் பகுதியில் மீண்டும் போர் மேகங்களைச் சூழ்ந்து கொள்ளச் செய்துள்ளது.
