பட்டாசு தயாரிப்பிற்குப் புகழ்பெற்ற விருதுநகர் மாவட்டம் சிவகாசி அருகே செங்கமலப்பட்டி கிராமத்தில் இயங்கி வரும் பட்டாசுத் தொழிற்சாலை குடோனில் ஏற்பட்ட திடீர் வெடி விபத்தில் 2 தொழிலாளர்கள் சம்பவ இடத்திலேயே பரிதாபமாக உயிரிழந்தனர். மேலும் பலர் படுகாயமடைந்துள்ள இந்தச் சம்பவம் அப்பகுதியில் பெரும் சோகத்தையும் அதிர்ச்சியையும் ஏற்படுத்தியுள்ளது.
செங்கமலப்பட்டி கிராமப் பகுதியில் உள்ள அந்தப் பட்டாசுத் தொழிற்சாலையில் வழக்கம்போல் தொழிலாளர்கள் பட்டாசு தயாரிப்பு மற்றும் மருந்து நிரப்பும் பணிகளில் ஈடுபட்டிருந்தனர். அப்போது எதிர்பாராதவிதமாக ஏற்பட்ட மருந்துகள் உராய்வு காரணமாகக் குடோனில் இருந்த பட்டாசுகள் திடீரென பயங்கர சத்தத்துடன் வெடித்துச் சிதறின. கணப்பொழுதில் தீ அனைத்துப் பகுதிகளுக்கும் பரவியதால் அங்குப் பணியில் இருந்த தொழிலாளர்கள் வெளியேற முடியாமல் சிக்கிக்கொண்டனர்.
தகவல் அறிந்து சம்பவ இடத்திற்கு விரைந்து வந்த தீயணைப்பு மற்றும் மீட்புப் பணிகள் துறையினர், போராடித் தீயைக் கட்டுக்குள் கொண்டுவந்தனர். இருப்பினும், இடிபாடுகளில் சிக்கி உடல்கள் கருகிய நிலையில் 2 பேர் உயிரிழந்து மீட்கப்பட்டனர். படுகாயமடைந்த மற்ற தொழிலாளர்கள் உடனடி முதலுதவிக்குப் பிறகுச் சிவகாசி அரசு மருத்துவமனைக்குச் சிகிச்சைக்காகக் கொண்டு செல்லப்பட்டுள்ளனர்.
சம்பவம் குறித்து மாரனேரி காவல் துறையினர் வழக்குப் பதிவு செய்து, பட்டாசு ஆலை உரிய பாதுகாப்பு விதிகளுடன் இயங்கியதா என்றும், விபத்திற்கான உண்மையான காரணம் என்னவென்றும் தீவிர விசாரணை மேற்கொண்டு வருகின்றனர். சிவகாசி பகுதியில் மீண்டும் ஒரு பட்டாசு வெடி விபத்து ஏற்பட்டு உயிர்ப்பலி நிகழ்ந்துள்ளது உள்ளூர் மக்களிடையே மிகுந்த சோகத்தை ஏற்படுத்தியுள்ளது.
