உக்ரைன் ராணுவம் ரஷ்ய நிலப்பரப்புகளின் மீது நடத்தி வரும் தீவிர ஆளில்லா விமான (Drone) தாக்குதல்கள் மற்றும் பாதுகாப்பு அச்சுறுத்தல்கள் காரணமாக, ரஷ்யாவின் மிக உயரிய கொண்டாட்டங்களில் ஒன்றான ஆண்டு கடற்படை தின (Navy Day) பிரம்மாண்ட அணிவகுப்பை ரஷ்ய அதிபர் விளாடிமிர் புதின் அதிரடியாக ரத்து செய்துள்ளார். வழக்கமாகச் செயின்ட் பீட்டர்ஸ்பர்க் மற்றும் கிரான்ஸ்டாட் பகுதிகளில் பல நூற்றுக்கணக்கான போர்க்கப்பல்கள் மற்றும் நீர்மூழ்கிக் கப்பல்களுடன் நடைபெறும் இந்த அணிவகுப்பு, பாதுகாப்பு காரணங்களுக்காக ரத்து செய்யப்படுவதாகக் கிரெம்ளின் மாளிகை உத்தியோகபூர்வமாக அறிவித்துள்ளது.
கடந்த சில மாதங்களாகவே ரஷ்யாவின் பால்டிக் கடல் பகுதி மற்றும் செயின்ட் பீட்டர்ஸ்பர்க் சுற்றுவட்டாரப் பகுதிகளில் உக்ரைனிய ட்ரோன்கள் தொடர்ச்சியாக ஊடுருவி தாக்குதல்களை நடத்தி வருகின்றன. அணிவகுப்பு நடைபெறவிருந்த பகுதிகளை இலக்கு வைத்து உக்ரைன் ட்ரோன்கள் ஊடுருவக்கூடும் என்றும், சொந்த நாட்டின் வான் பாதுகாப்பு அமைப்புகளின் மீது கிரெம்ளின் நிர்வாகத்திற்குப் போதிய நம்பிக்கை இல்லாததாலுமே இந்த முடிவு எடுக்கப்பட்டுள்ளதாகவும் சர்வதேச பாதுகாப்பு நிபுணர்கள் சுட்டிக்காட்டுகின்றனர்.
இது குறித்துச் செய்தியாளர்களிடம் பேசிய கிரெம்ளின் செய்தித் தொடர்பாளர் டிமிட்ரி பெஸ்கோவ், “தற்போதைய நாட்டின் ஒட்டுமொத்தப் பாதுகாப்புச் சூழலைக் கருத்தில் கொண்டு, பாதுகாப்பு காரணங்களுக்கே முதலிடம் அளிக்கப்பட்டு இந்த முடிவு எடுக்கப்பட்டுள்ளது” என்று தெரிவித்தார். பிரம்மாண்ட அணிவகுப்பு ரத்து செய்யப்பட்டபோதிலும், அதிபர் புதின் செயின்ட் பீட்டர்ஸ்பர்க்கில் உள்ள கடற்படைத் தலைமையகத்திற்கு நேரில் சென்று அதிகாரிகளுடன் ஆலோசனை நடத்தியதோடு, வீடியோ பதிவின் மூலம் வீரர்களுக்குத் தனது வாழ்த்துகளைத் தெரிவித்துக் கொண்டார்.
2017-ஆம் ஆண்டு புதினினால் மீண்டும் தொடங்கப்பட்ட இந்த வரலாற்று சிறப்புமிக்கக் கடற்படை தின அணிவகுப்பு, உக்ரைன் போரின் காரணமாக முழுமையாக ரத்து செய்யப்படுவது இதுவே முதன்முறையாகும். கருங்கடலில் உள்ள ரஷ்யாவின் போர்க்கப்பல்களில் மூன்றில் ஒரு பகுதியை உக்ரைன் ஏற்கனவே அழித்துள்ள நிலையில், நாட்டின் பிற கடற்படை தளங்களில் உள்ள கப்பல்களையும் பாதுகாக்கவே புதின் நிர்வாகம் இத்தகைய முன்னெச்சரிக்கை நடவடிக்கையை எடுத்துள்ளதாகத் தகவல்கள் தெரிவிக்கின்றன.
