ஐரோப்பிய நாடான கிரீஸின் தலைநகர் ஏதென்ஸுக்கு மேற்கே உள்ள காட்டுப்பகுதிகளில் மிகக் கொடூரமாகப் பரவி வரும் காட்டுத்தீயைக் கட்டுப்படுத்தும் வான்வழிப் பணியில் ஈடுபட்டிருந்த இரண்டு தீயணைப்பு ஹெலிகாப்டர்கள் எதிர்பாராதவிதமாக நடுவானில் நேருக்கு நேர் மோதி விபத்துக்குள்ளாகின. ஏதென்ஸின் அத்திகா பிராந்தியத்தில் அமைந்துள்ள சாத்தா (Psatha) பகுதியில் ஞாயிற்றுக்கிழமை மாலை இக்கோர விபத்து நிகழ்ந்தது, அப்பகுதியில் பெரும் சோகத்தையும் பரபரப்பையும் ஏற்படுத்தியுள்ளது.
எலெஃப்சினா (Elefsina) இராணுவ விமான நிலையத்திலிருந்து புறப்பட்டு, குறைந்த உயரத்தில் தண்ணீரை ஊற்றித் தீயை அணைக்கும் பணியில் ஈடுபட்டுக்கொண்டிருந்த போது, இரண்டு ‘பெல்’ (BELL) ரக ஹெலிகாப்டர்களின் சுழல் இறக்கைகள் (Rotors) ஒன்றோடொன்று மோதிக்கொண்டதாகத் தகவல்கள் தெரிவிக்கின்றன. மோதிய அதிர்ச்சியில் ஒரு ஹெலிகாப்டர் தீப்பிடித்துத் தரையில் தூக்கி வீசப்பட்டு நொறுங்கியது. இதில் இரண்டு ஹெலிகாப்டர்களிலும் தலா இருவர் வீதம் மொத்தம் 4 ஊழியர்கள் பயணம் செய்தனர்.
விபத்து நடந்த இடத்திற்கு உடனடியாக விரைந்த கிரேக்க நாட்டின் தீயணைப்புத் துறை மற்றும் இராணுவ மீட்புக் குழுவினர், தீவிர தேடுதல் மற்றும் மீட்புப் பணிகளை முடுக்கிவிட்டனர். ஒரு ஹெலிகாப்டரில் இருந்த வீரர்கள் காயங்களுடன் மீட்கப்பட்டுத் தொடர்பை ஏற்படுத்திய நிலையில், மற்றொரு ஹெலிகாப்டரின் ஊழியர்களை மீட்கும் பணிகள் தொடர்ந்து தீவிரமாக நடைபெற்று வருகின்றன.
தற்போது கிரீஸ் நாடு முழுவதும் 100 கி.மீ வேகத்தில் வீசி வரும் பலத்த காற்றினாலும், அதிக வெப்பத்தினாலும் 10,000 ஹெக்டேருக்கும் அதிகமான காடுகள் மற்றும் நூற்றுக்கணக்கான வீடுகள் சாம்பலாகியுள்ளன. 500-க்கும் மேற்பட்ட தீயணைப்பு வீரர்கள் மற்றும் சர்வதேச உதவிகளுடன் காட்டுத்தீயை அணைக்கப் போராடி வரும் வேளையில், மீட்புப் பணியில் ஈடுபட்ட ஹெலிகாப்டர்களே மோதி விபத்துக்குள்ளான சம்பவம் கிரீஸ் மக்களைக் கடும் அதிர்ச்சியில் ஆழ்த்தியுள்ளது.
