மனித இனம் உருவான வரலாறு மற்றும் பரிணாம வளர்ச்சி குறித்த தற்போதைய அறிவியல் புரிதல்களையே தலைகீழாக மாற்றும் வகையில், நவீன மனிதர்களின் மரபணுவில் (Human Genome) சுமார் 1.8 மில்லியன் ஆண்டுகள் பழமையான இரு புதிய ‘மர்மப் பேய் முன்னோடிகளின்’ (Ghost Ancestors) டிஎன்ஏ தடயங்கள் மறைந்திருப்பதை கலிபோர்னியா பல்கலைக்கழக (UC Berkeley) ஆராய்ச்சியாளர்கள் கண்டுபிடித்துள்ளனர். தொல்பொருள் எச்சங்கள் ஏதும் கிடைக்கப்பெறாத சூழலிலும், அதிநவீன மரபணு பகுப்பாய்வு மூலம் வெளிவந்துள்ள இந்தத் தகவல் உலக அறிவியல் சமூகத்தை வியப்பில் ஆழ்த்தியுள்ளது.
கணினி வழி மரபணு மாதிரிகள் (Computational Techniques) மூலம் மேற்கொள்ளப்பட்ட இந்த விரிவான ஆராய்ச்சியில், ‘ஹோமோ சேபியன்ஸ்’ (Homo sapiens) எனப்படும் மனித இனம், ஏற்கனவே அறியப்பட்ட நியாண்டர்தால் (Neanderthals) மற்றும் டெனிசோவன்ஸ் (Denisovans) தவிர்த்து இன்னும் இரு பழமையான மனித இனக் குழுக்களுடன் கலப்பினச் சேர்க்கையில் (Interbreeding) ஈடுபட்டது உறுதி செய்யப்பட்டுள்ளது. இதில் முதன்மை ‘பேய் முன்னோடி’ இனமானது சுமார் 8,00,000 ஆண்டுகளுக்கு முன்பே பிரிந்து சென்று, சுமார் 50,000 ஆண்டுகளுக்கு முன் மனிதர்களுடன் கலந்ததன் மூலம், இன்றைக்கு வாழும் அனைத்து மனிதர்களின் மரபணுவிலும் 0.5% முதல் 1% வரை தனது பதிவை விட்டுச் சென்றுள்ளது.
இரண்டாவதாகக் கண்டறியப்பட்ட ‘சூப்பர் ஆர்க்காயிக்’ (Super-archaic) என்றழைக்கப்படும் மிகவும் பழமையான முன்னோடி இனம், சுமார் 1.8 மில்லியன் ஆண்டுகளுக்கு முன்பே நவீன மனிதர்களின் இரத்த வழியிலிருந்து தனித்துப் பிரிந்ததாகும். இந்த பழம்பெரும் இனம் முதலில் ஆசியப் பகுதியில் வாழ்ந்த டெனிசோவன்களுடன் கலந்ததாகவும், பின்னர் டெனிசோவன்கள் வழியாகக் குறிப்பிட்ட ஓசியானியா (Oceania) பிராந்திய மனிதர்களின் மரபணுவிற்குள் 0.002% அளவுக்கு ஊடுருவியுள்ளதாகவும் ஆய்வாளர்கள் சுட்டிக்காட்டுகின்றனர். இந்த 1.8 மில்லியன் ஆண்டு பழமையான டிஎன்ஏ ‘ஹோமோ எரெக்டஸ்’ (Homo erectus) மனித இனத்திற்குரியதாக இருக்கலாம் என நம்பப்படுகிறது.
மக்கள்தொகை மற்றும் மனிதப் பரிணாம வரலாற்றில் இதுவரையிலும் அறியப்படாத புதிய பக்கங்களைத் திறந்துள்ள இந்த வரலாற்றுப்பூர்வ கண்டுபிடிப்பு, மனித இனம் தனித்து வாழாமல் பல லட்சம் ஆண்டுகளாகப் பல்வேறு பழங்குடி இனங்களுடன் இணைந்து வாழ்ந்த பிணைப்பை வெளிச்சம்போட்டுக் காட்டுகிறது. எதிர்காலத்தில் கண்டறியப்படும் புதிய புதைபடிவங்கள் மற்றும் விரிவான மரபணு தகவல்கள் மூலம் இந்த மர்மப் பேய் முன்னோடிகளின் துல்லியமான முகவரி மற்றும் தோற்றம் தெரியவரும் எனப் முன்னணி மரபியல் நிபுணர்கள் நம்பிக்கை தெரிவித்துள்ளனர்.
