தஞ்சாவூரில் நடைபெற்ற காவிரி உரிமைப் போராட்டத்தின் போது தெரிவித்த கருத்துக்கள் தொடர்பாகத் தமிழக சட்டமன்ற எதிர்க்கட்சித் தலைவரும் திமுக இளைஞரணிச் செயலாளருமான உதயநிதி ஸ்டாலின் கைது செய்யப்பட்ட விவகாரத்தில், நாம் தமிழர் கட்சியின் தலைமை ஒருங்கிணைப்பாளர் சீமான் தவெக அரசை மிகக் கடுமையாகச் சாடியுள்ளார். “காவிரி நதிநீர்ச் சிக்கலில் காட்டாத வேகத்தைக் கைது நடவடிக்கைக்கு முதலமைச்சர் விஜய் காட்டுவது ஏன்?” எனக் கேள்வி எழுப்பியுள்ள அவர், ஆளும் தரப்பின் இந்த அவசர நடவடிக்கை முற்றிலும் ஜனநாயக விரோதமானது எனத் தனது கண்டனத்தைப் பதிவு செய்துள்ளார்.
இது குறித்துச் சீமான் வெளியிட்டுள்ள அறிக்கையில், தமிழ்நாட்டின் வாழ்வாதாரப் பிரச்சனையான காவிரி நதிநீர் உரிமையைப் பெறவும், மேகதாது அணை திட்டத்திற்கு எதிர்ப்பு தெரிவிக்கவும் தேவையான உரிய அழுத்தங்களை மத்திய-மாநில அரசுகளுக்குக் கொடுக்காமல் மெத்தனப் போக்குடன் செயல்பட்டதாக தவெக அரசை விமர்சித்துள்ளார். காவிரியின் உரிமையை நிலைநாட்டுவதில் காட்டாத தீவிரத்தையும் வேகத்தையும், ஓர் எதிர்க்கட்சித் தலைவரைக் கைது செய்வதில் முதலமைச்சர் விஜய் காட்டியிருப்பது அவரது அரசியல் காழ்ப்புணர்ச்சியையே வெளிப்படுத்துகிறது என்று குற்றம் சாட்டியுள்ளார்.
அரசியல் மேடைகளில் பேசப்படும் பேச்சுக்களுக்கு சகிப்புத்தன்மையே ஜனநாயகத்தின் அடிப்படையாகும் என்பதை ஆளுங்கட்சி நினைவில் கொள்ள வேண்டும் என அறிவுறுத்தியுள்ள சீமான், மேடைகளில் தவறான கருத்துகள் பேசப்பட்டால் அவதூறு வழக்கு தொடர வேண்டுமே தவிர, எடுத்த எடுப்பிலேயே கைது நடவடிக்கையில் இறங்குவது அதிகார துஷ்பிரயோகம் என்றார். காவிரிக்காகத் தீவிரமாகப் போராட வேண்டிய இந்தச் சூழலில், ஆளுங்கட்சியும் எதிர்க்கட்சியும் தங்களுக்குள் கைது நாடகத்திலும் போராட்டத்திலும் ஈடுபட்டு மக்களின் கவனத்தை உண்மையான பிரச்சனைகளிலிருந்து திசைதிருப்புவது சாபக்கேடானது என்றும் சாடியுள்ளார்.
தங்களின் அரசியல் பழிவாங்கும் நடவடிக்கைக்காகக் காவல்துறையை ஏவல் படையாகப் பயன்படுத்துவதை முதலமைச்சர் விஜய் உடனடியாகக் கைவிட வேண்டும் என வலியுறுத்தியுள்ள சீமான், மக்களின் முதன்மைப் பிரச்சனையான காவிரி நதிநீர் உரிமையை மீட்க அரசு உறுதியான நடவடிக்கைகளை எடுக்க வேண்டும் என்றும் கேட்டுக்கொண்டுள்ளார். சீமானின் இந்த அதிரடிக் கண்டனம், உதயநிதி ஸ்டாலின் கைது விவகாரத்தால் ஏற்கெனவே சூடேறியுள்ள தமிழக அரசியல் களம் மற்றும் இணையதளங்களில் பெரும் விவாதப் பொருளாக மாறியுள்ளது.
