தமிழ் சினிமாவில் கடந்த 20 ஆண்டுகளுக்கும் மேலாக முன்னணி நடிகையாக வலம் வரும் த்ரிஷா, தமிழக வெற்றிக் கழகத்தின் (TVK) மூலம் நேரடி அரசியலில் கால் பதிக்கவுள்ளதாகத் தகவல்கள் பரவி வரும் நிலையில், மதுரையில் அவரது ரசிகர்கள் ஒட்டியுள்ள போஸ்டர்கள் அரசியல் களத்திலும் திரைத்துறையிலும் பெரும் பரபரப்பை ஏற்படுத்தியுள்ளன.
மதுரை நகரின் முக்கியப் பகுதிகளில் முதன்முறையாகத் ‘த்ரிஷா நற்பணி மன்றம்’ தொடங்கப்பட்டு, அதனடிப்படையில் ஒட்டப்பட்டுள்ள அந்த போஸ்டர்களில், “வீரமங்கை வேலுநாச்சியாரின் வழித்தோன்றலே! அரசியலுக்கு வருக!” என்ற வாசகங்கள் பொறிக்கப்பட்டுள்ளன. வேலுநாச்சியார் மற்றும் த்ரிஷாவின் படங்கள் இடம்பெற்றுள்ள இந்த போஸ்டர்கள், த்ரிஷா விரைவில் தவெகவில் இணைந்து தீவிர அரசியலில் ஈடுபடவுள்ளார் என்ற ஊகங்களுக்கு மேலும் வலு சேர்த்துள்ளன.
முதலமைச்சரும் தவெக தலைவருமான விஜய்யின் நெருங்கிய தோழியாக அறியப்படும் த்ரிஷா, தவெக சார்பில் இடைத்தேர்தலில் போட்டியிடக் கூடும் என்றும், கட்சியின் மகளிர் அணி அல்லது முக்கியப் பொறுப்பைப் பெற வாய்ப்புள்ளதாகவும் கூறப்பட்டு வருகிறது. சமீபத்தில் த்ரிஷாவைக் குறிப்பிட்டு எழுந்த அரசியல் விமர்சனங்களும், அதைத் தொடர்ந்து நடந்த சர்ச்சைகளும் தமிழக அரசியலில் பெரும் விவாதப் பொருளாக மாறியுள்ள நிலையில், இந்த போஸ்டர் நிகழ்வு மேலும் முக்கியத்துவம் பெற்றுள்ளது.
இருப்பினும், இந்த போஸ்டர் விவகாரத்திற்கும் தங்களது கட்சி நிர்வாகத்திற்கும் நேரடியாகத் தொடர்பில்லை என்றும், த்ரிஷாவின் அதிகாரப்பூர்வ அரசியல் வருகை குறித்துத் தவெக தலைமையோ அல்லது நடிகை த்ரிஷாவோ இதுவரை எந்தவித அறிவிப்பையும் வெளியிடவில்லை என்றும் கட்சி வட்டாரங்கள் தெரிவிக்கின்றன. மதுரை ரசிகர்கள் மற்றும் ஆதரவாளர்களின் இந்த அதிரடி நகர்வு, வரவிருக்கும் நாட்களின் அரசியல் மாற்றங்களுக்கு முன்னோட்டமா என்பதைப் பொறுத்திருந்தே பார்க்க வேண்டும்.
