ஈரானிய அதிபர் மசூத் பெசெஷ்கியான் (Masoud Pezeshkian), நாட்டின் உச்ச தலைவர் ஆயத்துல்லா அலி கமேனியுடன் (Ayatollah Ali Khamenei) நடத்திய உயர்மட்ட சந்திப்பு சுமார் 7 மணி நேரம் வரை நீடித்ததாகத் தெரிவித்துள்ளார். மத்திய கிழக்கில் நிலவும் கடுமையான போர் பதற்றங்கள் மற்றும் போரினால் ஏற்படக்கூடிய பின்விளைவுகள் குறித்தே இந்த நீண்ட நேரக் கலந்தாய்வில் முக்கியமாக விவாதிக்கப்பட்டதாக அவர் குறிப்பிட்டுள்ளார்.
ஈரானில் புதிய அரசு பதவியேற்றதைத் தொடர்ந்து, நாட்டின் பாதுகாப்பு, பொருளாதார சவால்கள் மற்றும் பிராந்தியத்தில் நிலவும் போர்ச் சூழல் குறித்து முடிவெடுக்க இந்த அவசரக் கூட்டம் நடத்தப்பட்டுள்ளது. குறிப்பாக இஸ்ரேல் மற்றும் அமெரிக்காவின் நகர்வுகள், ஈரான் ஆதரவு படைகளின் நிலைப்பாடு மற்றும் போரினால் சர்வதேச அளவில் ஈரான் சந்திக்கும் பொருளாதாரத் தடைகளின் விளைவுகள் குறித்து விரிவாக ஆராயப்பட்டுள்ளது.
7 மணி நேரம் நடைபெற்ற இந்தச் சந்திப்பு குறித்துப் பேசிய அதிபர் பெசெஷ்கியான், “நாட்டின் பாதுகாப்பு மற்றும் மக்களின் எதிர்காலத்தைக் கருத்தில் கொண்டு, போரின் அனைத்துப் பக்கங்களையும், அதன் கடுமையான விளைவுகளையும் உச்ச தலைவருடன் ஆழமாக விவாதித்தோம். பிராந்தியத்தில் அமைதியை பேணவும் அதே வேளையில் ஈரானின் தேசிய நலன்களைப் பாதுகாக்கவும் தேவையான முக்கிய முடிவுகள் எடுக்கப்பட்டுள்ளன” எனக் கூறினார்.
மத்திய கிழக்கில் போர்ப் பதற்றம் உச்சக்கட்டத்தை எட்டியுள்ள சூழலில், ஈரானின் உச்ச தலைவரும் அதிபரும் இணைந்து இவ்வளவு நீண்ட நேரம் ஆலோசனை நடத்தியிருப்பது சர்வதேச அரசியலில் பெரும் உற்றுநோக்கலாக மாறியுள்ளது. ஈரானின் அடுத்தகட்ட ராஜதந்திர மற்றும் ராணுவ நகர்வுகள் என்னவாக இருக்கும் என்ற எதிர்பார்ப்பு உலக நாடுகள் மத்தியில் அதிகரித்துள்ளது.
