மகாராஷ்டிராவில் பழுதடைந்த சாலைகளால் பொதுமக்கள் சந்திக்கும் இன்னல்களை வெளிச்சத்திற்குக் கொண்டுவர, பள்ளிக்கூட மாணவி ஒருவர் வித்தியாசமான முறையில் மேற்கொண்ட ‘ரிப்போர்ட்டிங்’ வீடியோ இணையத்தில் பெரும் வரவேற்பைப் பெற்றுள்ளது. தனது கையில் இருந்த குடையையே மைக்ரோஃபோனாக (Microphone) மாற்றி, ஒரு செய்தித் தொலைக்காட்சி நிருபரைப் போல அவர் அந்தப் பழுதடைந்த சாலை மற்றும் குழிகளைப் பற்றிப் பேசிய வீடியோ, சமூக வலைதளங்களில் காட்டுத் தீயாகப் பரவியது.
‘ஜென் ஆல்ஃபா’ (Gen Alpha) தலைமுறையைச் சேர்ந்த இந்த மாணவி, மிகுந்த தன்னம்பிக்கையுடனும், நகைச்சுவை உணர்வுடனும் சாலைகளின் மோசமான நிலையை விளக்கிய விதம் பலரையும் ஈர்த்தது. குண்டு குழியுமான சாலைகளால் வாகன ஓட்டிகள் மற்றும் மாணவர்கள் அடையும் துன்பங்களை அவர் சுட்டிக்காட்டிய விதம், சாதாரணமான ஒரு புகார் வீடியோவாக இல்லாமல், ஒரு சமூக ஆர்வலரின் குரலாக ஒலிக்கத் தொடங்கியது. இந்த வீடியோவை ஆயிரக்கணக்கானோர் பகிர்ந்து, சம்பந்தப்பட்ட அதிகாரிகளின் கவனத்திற்கு அதைக் கொண்டு சென்றனர்.
இந்த வீடியோ வைரலானதைத் தொடர்ந்து, உள்ளூர் நிர்வாகம் மற்றும் பொதுப்பணித் துறை அதிகாரிகள் உடனடியாக விழித்துக்கொண்டனர். மாணவி குறிப்பிட்ட அந்தப் பகுதியில் இருந்த பெரிய குழிகளைச் சரிசெய்யும் பணியை மேற்கொண்ட அதிகாரிகள், சாலைப் பணிகளை விரைந்து முடித்தனர். தற்போது குண்டும் குழியுமாக இருந்த அந்தச் சாலை, சீரமைக்கப்பட்டு பளபளவென மாறியுள்ளது. அதிகாரிகளின் இந்த விரைவான நடவடிக்கையை அந்த மாணவியின் தைரியத்திற்குப் கிடைத்த வெற்றியாக மக்கள் கொண்டாடி வருகின்றனர்.
சமூக ஊடகங்களின் சக்தியைச் சிறு வயதிலேயே உணர்ந்து, மிகச் சாதாரணமான ஒரு குடையை ஆயுதமாகப் பயன்படுத்தித் தனது பகுதிச் சிக்கலைத் தீர்த்த அந்த மாணவியின் செயல், இன்றைய இளம் தலைமுறையினரின் சமூக அக்கறையைப் பறைசாற்றியுள்ளது. எந்தப் பதவியிலும், பெரிய வசதிகளும் இல்லாமலேயே, தனது குரல் மூலம் மாற்றத்தை ஏற்படுத்த முடியும் என்பதற்கு இந்தச் சம்பவம் ஒரு சிறந்த முன்னுதாரணமாக மாறியுள்ளது.
