சிரியாவில் உள்நாட்டுப் போர் உச்சத்தில் இருந்த 2012-ம் ஆண்டு ஆகஸ்ட் மாதம் கடத்தப்பட்ட அமெரிக்கப் பத்திரிகையாளரும், முன்னாள் கடற்படை அதிகாரியுமான ஆஸ்டின் டைஸின் (Austin Tice) 14 ஆண்டுகாலக் கடத்தல் வழக்கு, பல்வேறு திடுக்கிடும் திருப்பங்களுடன் சர்வதேச அளவில் மீண்டும் உற்றுநோக்கப்பட்டு வருகிறது. ஆயுதமேந்திய பயங்கரவாதிகளால் அவர் அழைத்துச் செல்லப்படும் ஐஎஸ்ஐஎஸ் (ISIS) பாணி வீடியோக்கள் வெளியானது முதல், அவர் ஈரானியப் படைகளின் கட்டுப்பாட்டில் மாற்றப்பட்டிருக்கலாம் என்ற தகவல்கள் வரை இம்மர்மம் தொடர்கிறது.
அமெரிக்காவின் தி வாஷிங்டன் போஸ்ட் மற்றும் சிபிஎஸ் செய்திகளுக்காகப் பணியாற்றிய ஆஸ்டின் டைஸ், சிரிய தலைநகர் டமாஸ்கஸ் அருகே கடத்தப்பட்ட சில வாரங்களிலேயே, கண்கள் கட்டப்பட்ட நிலையில் ஆயுதமேந்திய பயங்கரவாதிகளால் அழைத்துச் செல்லப்படும் மிரட்டல் வீடியோ இணையத்தில் வெளியானது. ஆரம்பத்தில் இது ஐஎஸ்ஐஎஸ் அமைப்பின் செயல் என சந்தேகிக்கப்பட்டாலும், அவர் அப்போதைய பஷார் அல்-அசாத் அரசின் இரகசியப் சிறைமுகாமில் தான் அடைக்கப்பட்டிருந்தார் என்பது பின்னர் தெரியவந்தது.
சிரியாவில் அசாத் ஆட்சி கவிழ்ந்த பிறகு, அமெரிக்க உளவுத்துறையான எஃப்.பி.ஐ (FBI) நடத்திய விசாரணையில் அசாத்தின் முன்னாள் தளபதி பாசம் ஹாசன் என்பவர் “அசாத்தின் உத்தரவின் பேரில் ஆஸ்டின் கொல்லப்பட்டார்” எனக் கூறியதாகத் தகவல்கள் வெளியாகின. இருப்பினும், அமெரிக்க அரசும் ஆஸ்டினின் குடும்பத்தினரும் இந்தச் செய்தியை உறுதிப்படுத்த மறுத்துவிட்டனர். மேலும், அசாத் ஆட்சியின் கீழ் இயங்கிய பல சிறைகள் ஈரானியப் புரட்சிப் படையின் (IRGC) கட்டுப்பாட்டில் இருந்ததால், ஆட்சி மாற்றத்திற்குப் பிறகு ஆஸ்டின் ஈரானுக்கு ரகசியமாக மாற்றப்பட்டிருக்கலாம் என அவரது குடும்பத்தினர் சந்தேகிக்கின்றனர்.
கடந்த 14 ஆண்டுகளாக ஆஸ்டின் டைஸின் இருப்பிடம் குறித்துப் பல்வேறு முரண்பாடான தகவல்களும், போலி அடையாள எச்சரிக்கைகளும் வெளியாகி வரும் நிலையில், அவரைப் பாதுகாப்பாக மீட்பதற்கான முயற்சிகளை அமெரிக்க அரசு தொடர்ந்து மேற்கொண்டு வருகிறது. சர்வதேச அளவில் பெரும் பரபரப்பை ஏற்படுத்திய இந்த 14 ஆண்டுகாலப் பத்திரிகையாளர் கடத்தல் வழக்கு, மத்திய கிழக்கு அரசியலின் மற்றொரு கொடூரமான மர்மப் பக்கமாகவே நீடிக்கிறது.
