உக்ரைன் போரில் ரஷ்யப் படைகளுக்கு ஏற்பட்டுள்ள பெரும் இழப்புகள், நாட்டின் நிதி நெருக்கடி மற்றும் உள்நாட்டு ஆதரவு குறைந்து வருவது ஆகிய காரணங்களால் ரஷ்ய அதிபர் விளாடிமிர் புடின் ‘மூலையில் முடக்கப்பட்ட மிருகம்’ (Cornered Beast) போல மாறிவிட்டதாகவும், இதன் காரணமாகவே அவர் நேட்டோ (NATO) அமைப்பின் மீது நேரடித் தாக்குதல் நடத்தி 3-வது உலகப்போரை மூட்டிவிடும் அபாயம் நாளுக்கு நாள் அதிகரித்து வருவதாகவும் சர்வதேச பாதுகாப்பு நிபுணர்கள் மற்றும் பிரிட்டன் ஊடகங்கள் எச்சரித்துள்ளன.
உக்ரைன் உடனான போர் பல ஆண்டுகளாக நீடித்து வரும் நிலையில், ரஷ்ய ராணுவத்தின் பல்லாயிரக்கணக்கான வீரர்கள் உயிரிழந்துள்ளனர். போருக்கான நிதிச் செலவுகள் அதிகரிப்பு மற்றும் மேற்கத்திய நாடுகளின் பொருளாதாரத் தடைகளால் நாட்டின் கருவூலப் பணம் வேகமாகப் தீர்ந்து வருகிறது. மற்றொருபுறம் ரஷ்ய மக்கள் மற்றும் அதிகார வர்க்கத்தினர் இடையே புடினுக்கான ஆதரவு படிப்படியாகச் சரிந்து வருவதால், தனது அரசியல் எதிர்காலத்தையும் ஆட்சியையும் தக்கவைத்துக்கொள்ள புடின் தீவிரமான எந்தவொரு நடவடிக்கைக்கும் துணியலாம் என சர்வதேச பாதுகாப்பு ஆய்வாளர்கள் கருதுகின்றனர்.
நேட்டோ உறுப்பு நாடுகள் மீது ரஷ்யா சிறிய அளவிலான ஊடுருவல்களையோ அல்லது கடுமையான இணையவழித் தாக்குதல்களையோ (Cyber Attacks) நடத்தி, நேட்டோ கூட்டணியின் உறுதியையும் பதிலடி கொடுக்கும் திறனையும் சோதிக்கத் திட்டமிட்டுள்ளதாக அமெரிக்க மற்றும் பிரிட்டன் உளவு அமைப்புகள் எச்சரித்துள்ளன. புடினின் இத்தகைய ஆபத்தான நகர்வுகள், அமெரிக்கா தலைமையிலான நேட்டோ படைகளுக்கும் ரஷ்யாவிற்கும் இடையே நேரடி ராணுவ மோதலை உருவாக்கி, அதுவே முழு அளவிலான மூன்றாம் உலகப்போருக்கு (World War 3) வழிவகுக்கும் என்ற அச்சம் ஐரோப்பிய நாடுகளிடையே எழுந்துள்ளது.
அதிபர் புடின் தொடர்ச்சியாகப் போரைத் தீவிரப்படுத்தி வரும் நிலையில், “உலக அமைதிக்குப் புடின் மிகப்பெரிய அச்சுறுத்தலாக மாறியுள்ளார்” என மேற்கத்திய பாதுகாப்பு நிபுணர்கள் சுட்டிக்காட்டுகின்றனர். சர்வதேச அளவில் பதற்றம் உச்சத்தைத் தொட்டுள்ள இச்சூழலில், ரஷ்யாவின் எந்தவொரு அத்துமீறலையும் எதிர்கொள்ள நேட்டோ படைகளும் எல்லையோரப் பகுதிகளில் தங்களது பாதுகாப்பை மேலும் பலப்படுத்தி வருகின்றன.
