இந்தோனேசியாவின் ஆச்சே (Aceh) மாகாணத்தில் ஷரியா (Sharia) சட்ட விதிகளின்படி, திருமணத்திற்குப் புறம்பான உறவில் (Adultery) ஈடுபட்டதாகக் குற்றஞ்சாட்டப்பட்ட நான்கு நபர்களுக்குப் பொதுவெளியில் தலா 100 கசையடிகள் வழங்கும் கொடூரத் தண்டனை நிறைவேற்றப்பட்டுள்ளது. இஸ்லாமிய மார்க்கச் சட்டங்கள் மிகக் கடுமையாகப் பின்பற்றப்படும் ஆச்சே பிராந்தியத்தில், திருமண உறவை மீறிய குற்றத்திற்காக அதிகபட்சத் தண்டனையாக இந்தக் கசையடிகள் வழங்கப்பட்டன.
பொதுமக்கள் பலர் வேடிக்கை பார்த்துக் கொண்டிருந்த நிலையில், மேடையில் நிறுத்தப்பட்டு தடிமனான பிரம்பைக் கொண்டு குற்றவாளிகளின் முதுகில் தொடர்ச்சியாகக் கசையடிகள் கொடுக்கப்பட்டன. தண்டனையின் போது வலி தாங்க முடியாமல் தண்டனைக்குள்ளானவர்கள் அலறிய போதிலும், சட்டப்பூர்வ மேற்பார்வையாளர்கள் மற்றும் மருத்துவக் குழுவினரின் முன்னிலையில் எண்ணிக்கையைக் குறைக்கம் இல்லாமல் தண்டனை தொடர்ந்து நிறைவேற்றப்பட்டது.
இருப்பினும், தண்டனைக்குள்ளானப் பெண்களில் ஒருவருக்குக் கசையடி வழங்கிய நபர், அவரது வேதனையைப் பார்த்து இரக்கப்பட்டு அடிக்கும் வேகத்தைக் குறைத்துக் மெதுவாக அடித்ததாக நேரில் பார்த்தவர்கள் தரப்பில் தெரிவிக்கப்பட்டுள்ளது. ஆனால், அங்கிருந்த சட்ட அமலாக்க அதிகாரிகள் உடனடியாகத் தலையிட்டு, சட்டப்படி சரியான பலத்துடன் கசையடிகளை வழங்க வேண்டும் என அந்த நபரை எச்சரித்துத் தண்டனையைத் தொடரச் செய்தனர்.
ஆச்சே மாகாணத்தில் சூதாட்டம், மது அருந்துதல், ஓரினச்சேர்க்கை மற்றும் திருமணத்திற்குப் புறம்பான உறவு போன்ற செயல்களுக்குப் பொதுவெளியில் கசையடி கொடுக்கும் வழக்கம் தொடர்கதையாக உள்ளது. மனித உரிமை அமைப்புகள் மற்றும் சர்வதேசச் சமூகத்தின் கடுமையான எதிர்ப்புகளையும் மீறி, குற்றங்களைத் தடுப்பதற்கும் மார்க்கச் சட்டங்களைப் பேணுவதற்கும் இத்தகையத் தண்டனைகள் அவசியமானது என உள்ளூர் அரசு நிர்வாகம் தொடர்ந்து வாதிட்டு வருகிறது.
