ஐபிஎல் தொடருக்கான வீர பரிமாற்ற (Trading) காலத்தில், மும்பை இந்தியன்ஸ் அணியின் நட்சத்திர ஆல்ரவுண்டர் ஹர்திக் பாண்டியாவை சென்னை சூப்பர் கிங்ஸ் (CSK) அணிக்குக் கொண்டுவருவது தொடர்பான பேச்சுவார்த்தையில் முன்னேற்றம் ஏற்பட்டுள்ளதாகத் தகவல்கள் வெளியாகியுள்ளன. சிஎஸ்கே தலைமைப் பயிற்சியாளர் ஜாகீர் கான் மற்றும் மும்பை நிர்வாகத்திற்கு இடையே இதுகுறித்த ஆலோசனைகள் தீவிரமடைந்துள்ளன.
மும்பை இந்தியன்ஸ் அணியில் திலக் வர்மாவுக்குக் கேப்டன் பதவி வழங்க நிர்வாகம் திட்டமிட்டு வரும் சூழலில், ஹர்திக் பாண்டியா சென்னை அணிக்கு மாற விருப்பம் தெரிவித்துள்ளதாகக் கூறப்படுகிறது. இருப்பினும், ஹர்திக்கிற்குப் பதிலாகக் இளம் வீரர்களான ஆயுஷ் மாத்ரே அல்லது கலீல் அகமதுவைக் கேட்க மும்பை நிர்வாகம் ஆர்வம் காட்டி வருகிறது. ஆனால், சிஎஸ்கே தலைமைப் பயிற்சியாளர் ஜாகீர் கான் இளம் வீரர்களை விட்டுக்கொடுக்க முடியாது என்பதில் உறுதியாக உள்ளதால் பேச்சுவார்த்தையில் புதிய உத்திகள் வகுக்கப்பட்டு வருகின்றன.
சென்னை சூப்பர் கிங்ஸ் அணியைப் பொறுத்தவரை, ஹர்திக் பாண்டியாவுக்குக் கேப்டன் பதவி வழங்கப்பட மாட்டாது என்றும், ஆனால் ஆடும் லெவனில் ரெகுலராக வாய்ப்பளிக்கப்பட்டு பேட்டிங் மற்றும் பந்துவீச்சில் முக்கியத்துவம் தரப்படும் என்றும் உறுதி அளிக்கப்பட்டுள்ளது. மேலும், ஷிவம் துபேவை டிரேடிங்கில் வழங்கி ஹர்திக்கை வாங்குவதே தற்போதைய திட்டமாகப் பரிசீலிக்கப்பட்டு வருகிறது. தேசிய அணியில் மீண்டும் இடம்பிடிக்க ஐபிஎல் செயல்பாடுகள் அவசிய என்பதால், ஹர்திக் பாண்டியாவும் சிஎஸ்கே அளித்துள்ள இந்த டீலை ஏற்க முன்வந்துள்ளதாகத் தகவல்கள் தெரிவிக்கின்றன.
வீரர்களைத் தக்கவைப்பதற்கானக் கெடு வரவிருக்கும் நவம்பர் 15-ஆம் தேதியுடன் நிறைவடைய உள்ள நிலையில், இரு அணிகளுக்கு இடையிலான இந்த டிரேடிங் ஒப்பந்தம் விரைவில் இறுதி செய்யப்படும் என எதிர்பார்க்கப்படுகிறது. இரு அணிகளின் முக்கிய நிர்வாகிகளும் பேச்சுவார்த்தையில் ஈடுபட்டுள்ளதால், ஐபிஎல் வட்டாரத்தில் இந்த டிரேடிங் ஒப்பந்தம் குறித்த அதிகாரப்பூர்வ அறிவிப்பு விரைவில் வெளியாகக்கூடும்.
