அமெரிக்க பாதுகாப்புத் தலைமையகமான பென்டகன் (Pentagon) வெளியிட்டுள்ள வருடாந்திர அறிக்கையின்படி, அமெரிக்க ராணுவத்தில் பதிவாகும் பாலியல் அத்துமீறல் மற்றும் வன்கொடுமை வழக்குகள் தொடர்ந்து மூன்றாவது ஆண்டாகக் குறைந்துள்ளன. 2025 நிதியாண்டில் பெறப்பட்ட அதிகாரப்பூர்வ புகார்களின் எண்ணிக்கை 7,998 ஆக சரிந்துள்ளது. இது 2023-இல் 8,515 ஆகவும், 2024-இல் 8,195 ஆகவும் இருந்த நிலையில், தற்போது குறிப்பிடத்தக்க அளவில் குறைந்துள்ளதாக தரவுகள் தெரிவிக்கின்றன.
அதிகாரப்பூர்வமாகப் பதிவு செய்யப்பட்ட புகார்களின் எண்ணிக்கை குறைந்தபோதிலும், பாதிக்கப்பட்டவர்கள் முன்வந்து தைரியமாகப் புகார் அளிக்கும் விகிதம் (Reporting Rate) 2023-இல் 25%-ஆக இருந்தது, 2025-இல் 33%-ஆக உயர்ந்துள்ளது. பாதிக்கப்பட்ட வீரர்களுக்கு உரிய மருத்துவப் பராமரிப்பு மற்றும் சட்ட உதவிகளை வழங்குவதோடு, குற்றவாளிகள் மீது உரிய நடவடிக்கை எடுக்க வழிவகுப்பதால், இந்தப் புகார் அளிக்கும் விகித உயர்வு நேர்மறையான மாற்றமாகப் பார்க்கப்படுவதாகப் பென்டகன் தெரிவித்துள்ளது.
இரண்டு ஆண்டுகளுக்கு ஒருமுறை இரகசியமாக நடத்தப்படும் கணக்கெடுப்பின்படி, பணியில் உள்ள பெண் வீரர்களில் தேவையற்ற பாலியல் தீண்டல்களைச் சந்தித்தவர்களின் விகிதம் 2023-இல் 6.8%-லிருந்து 4.3%-ஆகக் குறைந்துள்ளது. அதேபோல, ஆண் வீரர்களுக்கான பாதிப்பு விகிதமும் 1.3%-லிருந்து 1%-ஆகக் குறைந்துள்ளது. ராணுவத்தில் பாலியல் குற்றங்கள் தொடர்பான வழக்குகளைத் தளபதிகளின் கட்டுப்பாட்டிலிருந்து நீக்கி, சுயாதீன சிறப்பு வழக்கறிஞர்களிடம் ஒப்படைக்கும் ராணுவ நீதித்துறைச் சீர்திருத்தங்கள் (Military Justice Reforms) நடைமுறைக்கு வந்ததே இம்மாற்றத்திற்கு முக்கியக் காரணமாகக் கருதப்படுகிறது.
ராணுவத்தின் கட்டுப்பாடு மற்றும் தயார்நிலையை உறுதி செய்யப் பாலியல் குற்றங்களைத் தடுப்பது மிகவும் அவசியம் எனப் பென்டகன் வலியுறுத்தியுள்ளது. இருப்பினும், புகாரளிக்கத் தயங்கும் போக்கு இன்னமும் முழுமையாக மாறவில்லை என்றும், பாலியல் அத்துமீறல்களற்ற பாதுகாப்பான சூழலை ராணுவத்தில் உருவாக்க மேலும் தீவிர தடுப்பு நடவடிக்கைகளும், விழிப்புணர்வுப் பயிற்சிகளும் தொடரும் என்றும் அமெரிக்கப் பாதுகாப்புத்துறை அதிகாரிகள் தெரிவித்துள்ளனர்.
