உக்ரைன் போரில் பிரிட்டன் தயாரிப்பான ‘ஸ்டார்ம் ஷேடோ’ (Storm Shadow) நீண்டதூர ஏவுகணைகளை ரஷ்ய எல்லைக்குள் பயன்படுத்தித் தாக்குதல் நடத்த அனுமதி அளித்ததைத் தொடர்ந்து, பிரிட்டன் மீது ரஷ்ய அதிபர் விளாடிமிர் புடின் கடும் கோபத்தில் உள்ளதாகத் தகவல்கள் வெளியாகியுள்ளன. சர்வதேச ஊடக அறிக்கைகளின்படி, பிரிட்டன் இந்த போரில் நேரடியாகப் பங்கேற்றுள்ளதாகவும், அதற்கான விளைவுகளைச் சந்திக்க வேண்டி வரும் என்றும் ரஷ்யா பகிரங்கமாக எச்சரித்துள்ளது.
இந்தச் சூழலில், பிரிட்டனின் முக்கிய பாதுகாப்பு மற்றும் இராணுவத் தலைவர்களை (UK Defence Chiefs) இலக்கு வைத்து இரகசியப் படுகொலைத் திட்டங்கள் அல்லது நாசவேலைகளை நடத்த ரஷ்ய உளவுத்துறை திட்டமிட்டு வரலாம் எனப் பாதுகாப்பு அமைப்புகள் அச்சம் தெரிவித்துள்ளன. ரஷ்யாவின் ‘சிகப்பு கோட்டை’ (Red Line) பிரிட்டன் கடந்துவிட்டதாகக் கருதும் கிரெம்ளின் நிர்வாகம், பிரிட்டனின் பாதுகாப்பு அமைப்புகளுக்குப் பதிலடி கொடுக்கப் பல்வேறு வழிகளில் காய் நகர்த்தி வருகிறது.
முன்னதாக, உக்ரைனுக்கு வழங்கப்பட்ட ஸ்டார்ம் ஷேடோ ஏவுகணைகள் ரஷ்ய இராணுவ முகாம்கள் மற்றும் தளவாடங்கள் மீது வெற்றிகரமாகப் பயன்படுத்தப்பட்டதாக உக்ரைன் உறுதிப்படுத்தியது. இதற்குப் பதிலடியாகப் பிரிட்டன் நாட்டின் இராணுவ உள்கட்டமைப்புகள், மூத்த பாதுகாப்பு அதிகாரிகள் மற்றும் உளவுத்துறைத் தலைவர்களுக்கு எதிரான அச்சுறுத்தல்களை ரஷ்யா தீவிரப்படுத்தக்கூடும் என பிரிட்டன் உளவுத்துறை அதிகாரிகள் எச்சரிக்கை விடுத்துள்ளனர்.
நேட்டோ உறுப்பு நாடுகளுக்கும் ரஷ்யாவிற்கும் இடையிலான மோதல் உச்சக்கட்டத்தை எட்டியுள்ள நிலையில், பிரிட்டனில் உள்ள முக்கிய இராணுவ தளங்கள் மற்றும் அதிகாரிகளின் பாதுகாப்பை அதிகரிக்கப் பலத்த நடவடிக்கைகள் மேற்கொள்ளப்பட்டு வருகின்றன. ரஷ்யாவின் இந்த அச்சுறுத்தல் சர்வதேச அளவில் பெரும் பரபரப்பையும் போர் தீவிரமடையும் என்ற அச்சத்தையும் ஏற்படுத்தியுள்ளது.
