அமெரிக்காவில் சுமார் 3,000 பேரின் உயிரைப் பறித்த 2001 செப்டம்பர் 11 தீவிரவாதத் தாக்குதலின் முக்கியச் சூத்திரதாரியாகக் கருதப்படும் அல்-கொய்தா அமைப்பின் முன்னாள் மூளை காலித் ஷேக் முகமது (Khalid Sheikh Mohammed) மற்றும் அவரது 3 கூட்டாளிகள் மீதான வழக்கின் விசாரணை 2028-ஆம் ஆண்டு ஜூன் 5-ஆம் தேதி தொடங்கும் என அமெரிக்க ராணுவ நீதிமன்ற நீதிபதி அதிகாரப்பூர்வமாக அறிவித்துள்ளார். கொடூரத் தாக்குதல் நடந்து 27 ஆண்டுகள் நிறைவடையும் தருவாயில் இந்த வரலாற்றுச் சிறப்புமிக்க விசாரணை தொடங்கப்படவுள்ளது உலகளவில் பெரும் கவனத்தைப் பெற்றுள்ளது.
கியூபாவில் உள்ள அமெரிக்காவின் குவாண்டனமோ பே (Guantanamo Bay) ராணுவ முகாமில் அடைக்கப்பட்டுள்ள காலித் ஷேக் முகமது உட்பட நான்கு பேர மீதான இந்த விசாரணையை 2027 ஜனவரியிலேயே தொடங்க அரசுத் தரப்பு வழக்குரைஞர்கள் கோரிக்கை விடுத்திருந்தனர். எனினும், வழக்கில் இன்னும் தீர்க்கப்படாமல் உள்ள பல முக்கியக் சாட்சியங்கள் மற்றும் சட்டரீதியான சிக்கல்களை ஆய்வு செய்யக் கூடுதல் கால அவகாசம் தேவைப்படுவதால், 2028 ஜூன் மாதமே விசாரணைக்கு உகந்த காலம் என ராணுவ நீதிமன்ற நீதிபதி லெப்டினன்ட் கர்னல் மைக்கேல் ஷ்ராமா (Michael Schrama) தனது 11 பக்க உத்தரவில் தெளிவுபடுத்தியுள்ளார்.
கடந்த ஆண்டு, பிரதிவாதிகள் தங்களுக்கு மரண தண்டனை விதிக்கப்படக் கூடாது என்ற நிபந்தனையுடன் குற்றத்தை ஒப்புக்கொள்ள முன்வந்த சமரச ஒப்பந்தத்தை (Plea Deal) அமெரிக்க மேல்முறையீட்டு நீதிமன்றம் நிராகரித்து ரத்து செய்தது. இதனால், குற்றம் சாட்டப்பட்ட நால்வருக்கும் அமெரிக்க ராணுவச் சட்டத்தின் கீழ் மரண தண்டனை கிடைப்பதற்கான சட்டரீதியான வாய்ப்புகள் மீண்டும் விரிவடைந்துள்ளன. 2003-ஆம் ஆண்டு பாகிஸ்தானில் கைது செய்யப்பட்ட காலித் ஷேக் முகமதுவிடம் சிஐஏ (CIA) மேற்கொண்ட கடுமையான விசாரணை முறைகள் மற்றும் ரகசியச் சாட்சியங்கள் தொடர்பான விவாதங்களே வழக்கு விசாரணை இத்தனை ஆண்டுகள் தள்ளிப்போக முதன்மைக் காரணமாக அமைந்தது.
2028 ஜூன் 5-ஆம் தேதி ராணுவ அதிகாரிகளைக் கொண்ட நடுவர் மன்றம் (Jury) தேர்வுடன் தொடங்கும் இந்த விசாரணையில், அரசுத் தரப்பு மற்றும் பிரதிவாதிகள் தரப்பு சாட்சியங்கள் அடுத்தடுத்து முன்வைக்கப்படவுள்ளன. கால் நூற்றாண்டைக் கடந்து நீடித்து வரும் இந்த சட்டப் போராட்டத்தின் மூலம், 9/11 பயங்கரவாதத் தாக்குதலில் தங்களது உறவுகளைப் பறிகொடுத்த ஆயிரக்கணக்கான அமெரிக்கக் குடும்பங்களுக்கு இறுதியாக நீதி கிடைக்கும் என எதிர்பார்க்கப்படுகிறது.
