கோவை அவினாசி சாலையில் உள்ள நவா இந்தியா பகுதியில் அமைக்கப்பட்டிருந்த தனியார் கட்டுமான நிறுவனத்தின் தற்காலிகத் தொழிலாளர் குடியிருப்பில் இன்று காலை திடீரெனப் பயங்கர தீ விபத்து ஏற்பட்டது. தகரக் கொட்டகைகளால் அமைக்கப்பட்டிருந்த இந்தக் குடியிருப்பில் தங்கியிருந்த வடமாநிலத் தொழிலாளர்கள் சமையல் செய்ய முயன்றபோது எதிர்பாராதவிதமாக சமையல் எரிவாயு சிலிண்டர் வெடித்து இந்த அசம்பாவிதம் ஏற்பட்டுள்ளது.
குடியிருப்பில் வெடித்த தீ மிக வேகமாகப் பக்கத்து வீடுகளுக்கும் பரவியதால், அங்கு வைக்கப்பட்டிருந்த அடுத்தடுத்த சமையல் எரிவாயு சிலிண்டர்கள் சங்கிலித் தொடராக வெடித்துச் சிதறின. இதனால் எழுந்த பயங்கரச் சத்தமும் அடர்ந்த புகையும் அக்கம் பக்கத்தில் உள்ள பொதுமக்களிடையே பெரும் பீதியையும் பதற்றத்தையும் ஏற்படுத்தியது. இந்தத் தீ விபத்தில் தொழிலாளர்கள் தங்கியிருந்த 70-க்கும் மேற்பட்ட தகர வீடுகள் முற்றிலும் எரிந்து சாம்பலாகின.
விபத்து குறித்து உடனடியாகத் தகவலறிந்து வந்த பீளமேடு, கணபதி, கோவை தெற்கு மற்றும் வடக்குத் தீயணைப்பு நிலையங்களைச் சேர்ந்த 40-க்கும் மேற்பட்ட தீயணைப்பு வீரர்கள் 4-க்கும் மேற்பட்ட வாகனங்களில் சம்பவ இடத்திற்கு விரைந்து வந்து தீவிரமாகப் போராடித் தீயைக் கட்டுக்குள் கொண்டுவந்தனர். மேலும், அசம்பாவிதம் மேலும் பரவாமல் தடுக்க ஆபத்தான நிலையிலிருந்த 30-க்கும் மேற்பட்ட சிலிண்டர்களைத் தீயணைப்பு வீரர்கள் சாதுரியமாக மீட்புப் பணி மூலம் பாதுகாப்பாக வெளியேற்றினர்.
அதிர்ஷ்டவசமாக, பெரும்பாலான தொழிலாளர்கள் காலையிலேயே பணிக்குச் சென்றுவிட்டதால் இந்த விபத்தில் எவ்வித உயிர்ச்சேதமோ அல்லது காயங்களோ ஏற்படவில்லை எனத் தீயணைப்புத் துறை மற்றும் காவல்துறையினர் உறுதிப்படுத்தியுள்ளனர். இருப்பினும் தொழிலாளர்களின் உடைமைகள் முற்றிலும் எரிந்து நாசமாகியுள்ள நிலையில், விபத்துக்கான முதன்மைக் காரணம் குறித்துப் பீளமேடு காவல்துறையினர் வழக்குப்பதிவு செய்து விசாரணை மேற்கொண்டு வருகின்றனர்.
