இங்கிலாந்தின் புகழ்பெற்ற இங்கிலீஷ் பிரிமீயர் லீக் (Premier League) கால்பந்து அமைப்பின் வங்கிக் கணக்கில் இருந்த 10 மில்லியன் பவுண்டுகளை (இந்திய மதிப்பில் சுமார் ரூ.110 கோடி) பிரித்தானியாவின் ‘தேசிய குற்றவியல் முகமை’ (NCA) அதிரடியாக முடக்கியுள்ளது. பிரித்தானியாவின் எஃப்.பி.ஐ (FBI) என்று அழைக்கப்படும் இந்த அமைப்பு, அனுமதி பெறாத சட்டவிரோதக் கிரிப்டோ சூதாட்டம் தொடர்பான குற்றச்சாட்டுகளின் கீழ் இந்த நடவடிக்கையை மேற்கொண்டுள்ளது.
பிரிமீயர் லீக் அமைப்பிற்குச் சொந்தமான ‘பார்க்லேஸ்’ (Barclays) வங்கிக் கணக்கில் இருந்த இந்த பெரும் தொகையை முடக்குவதற்கு வெஸ்ட்மின்ஸ்டர் நீதிமன்றம் அனுமதி வழங்கியதன் பேரில் நடவடிக்கை எடுக்கப்பட்டது. லியோனல் மெஸ்ஸி மற்றும் எம்பாப்பே போன்ற உலகின் முன்னணி கால்பந்து நட்சத்திரங்களால் விளம்பரப்படுத்தப்பட்ட ‘சொரே’ (Sorare) என்ற கிரிப்டோ கேமிங் நிறுவனத்துடன் பிரிமீயர் லீக் மேற்கொண்ட நிதியுதவி ஒப்பந்தத்தின் முதற்கட்டப் பணமே இந்த 10 மில்லியன் பவுண்டுகள் ஆகும்.
சொரே நிறுவனம் முறையான உரிமம் பெறாமல் கிரிப்டோ அடிப்படையிலான சூதாட்ட சேவைகளை வழங்கியதாகப் பிரித்தானியச் சூதாட்ட ஆணையம் குற்றச்சாட்டு சுமத்தியுள்ளது. இதன் எதிரொலியாகவே, மூன்றாம் தரப்பு குற்றவியல் நடவடிக்கைகளுடன் இந்த நிதிக்குத் தொடர்பு உள்ளதா என்பதை ஆராயவும், பணம் கைமாறுவதைத் தடுக்கவும் இந்த முடக்கம் செய்யப்பட்டுள்ளதாகப் புலனாய்வு அமைப்பின் செய்தித் தொடர்பாளர் உறுதிப்படுத்தியுள்ளார்.
இருப்பினும், பிரிமீயர் லீக் அமைப்பு நேரடியாக எந்தவித சட்டவிரோதச் செயல்களிலும் ஈடுபடவில்லை என்பதும் தெளிவுபடுத்தப்பட்டுள்ளது. இந்த நிதியின் மீதான முடக்கக் கட்டுப்பாடுகளைத் தளர்த்தக் கோரி பிரிமீயர் லீக் தரப்பு நீதிமன்றத்தை அணுக திட்டமிட்டுள்ள நிலையில், முன்னணி கால்பந்து அமைப்பின் வங்கிக் கணக்கு முடக்கப்பட்ட சம்பவம் விளையாட்டு மற்றும் வர்த்தக உலகில் பெரும் அதிர்ச்சியை ஏற்படுத்தியுள்ளது.
