இந்தியாவில் நடைபெற்று வரும் 18-வது பிரிக்ஸ் (BRICS) உச்சிமாநாட்டில் பங்கேற்பதற்காக புதுடெல்லி வந்துள்ள ஈரான் அதிபர் மசூத் பெசெஷ்கியான் (Masoud Pezeshkian), இந்திய மதத் தலைவர்கள், ஆன்மீகக் குருமார்கள் மற்றும் ஹுரியத் தலைவரான மிர்வைஸ் உமர் ஃபரூக் ஆகியோரை நேரில் சந்தித்துப் பேச்சுவார்த்தை நடத்தியுள்ளார்.
டெல்லியில் உள்ள ஈரான் தூதரகம் சார்பில் ஏற்பாடு செய்யப்பட்டிருந்த இந்த உயர்நிலைக் கூட்டத்தில், சமண ஆன்மீகக் குரு ஆச்சார்யா லோகேஷ் முனி, காஷ்மீர் மதத் தலைவர் மிர்வைஸ் உமர் ஃபரூக் மற்றும் இந்திய தொழில்முனைவோர்கள் கலந்துகொண்டனர். இச் சந்திப்பின் போது, தற்போதைய சர்வதேசச் சூழலில் அமைதியும் நீதியும் நிலைநாட்டப்பட வேண்டியதன் அவசியத்தை ஈரான் அதிபர் மசூத் பெசெஷ்கியான் வலியுறுத்திப் பேசினார்.
கூட்டத்திற்குப் பின் செய்தியாளர்களிடம் பேசிய ஹுரியத் தலைவர் மிர்வைஸ் உமர் ஃபரூக், “நீதி நிலைநாட்டப்படும் போது மட்டுமே உலகில் உண்மையான அமைதி ஏற்படும்; போர் மற்றும் வன்முறைகள் எதற்கும் தீர்வாகாது” என்று தெரிவித்தார். மேலும், மத்திய கிழக்கு பிராந்தியத்தில் நிலவும் பதற்றமான சூழல் தணிக்கப்பட்டு, பேச்சுவார்த்தை மற்றும் ராஜதந்திர வழிகளில் அமைதியை ஏற்படுத்த உலக வல்லரசுகள் முன்வர வேண்டும் என்றும் அவர் கேட்டுக்கொண்டார்.
முன்னதாக, பிரிக்ஸ் மாநாட்டின் இடையே பிரதமர் நரேந்திர மோடியைச் சந்தித்து இருதரப்பு உறவுகள் குறித்து ஆலோசித்த ஈரான் அதிபர், அதனைத் தொடர்ந்து இந்திய ஆன்மீகத் தலைவர்களைச் சந்தித்தது சர்வதேச அரசியல் மற்றும் ராஜதந்திர வட்டாரங்களில் முக்கியத்துவம் வாய்ந்த நிகழ்வாகப் பார்க்கப்படுகிறது.
