இந்தியன் பிரீமியர் லீக் (ஐபிஎல்) தொடரில் ஐந்து முறை சாம்பியனான சென்னை சூப்பர் கிங்ஸ் (சிஎஸ்கே) நிர்வாகம், அணியின் எதிர்காலக் கட்டமைப்பை மனதில் கொண்டு மூத்த வீரர் சஞ்சு சாம்சனுக்குப் பதிலாக இரண்டு இளம் திறமையாளர்களைத் தயார் செய்யத் தீவிர ஆலோசனையில் ஈடுபட்டு வருகிறது. அணிக்குள் தொடர்ச்சியாக நிலவி வரும் பல்வேறு மாற்றங்கள் மற்றும் கேப்டன்சி தொடர்பான விவாதங்களுக்கு மத்தியில், நீண்டகால எதிர்காலத் திட்டத்தின் ஒரு பகுதியாக இந்த முடிவு பரிசீலிக்கப்பட்டு வருவதாகத் தகவல்கள் வெளியாகியுள்ளன.
சிஎஸ்கே நிர்வாகத்தின் இந்த எதிர்காலத் திட்டத்தில், இளம் விக்கெட் கீப்பர்-பேட்டரான கார்த்திக் சர்மா மற்றும் வளர்ந்து வரும் இளம் தொடக்க வீரரான ஆயுஷ் மாத்ரே ஆகிய இருவருக்கே முன்னுரிமை வழங்க முடிவு செய்யப்பட்டுள்ளதாகக் கூறப்படுகிறது. கடந்த பருவத்தில் மிடில் வரிசையில் களம் இறங்கித் தனது நிதானமான மற்றும் அதிரடி பேட்டிங்கால் கவனத்தை ஈர்த்த கார்த்திக் சர்மாவை, சஞ்சு சாம்சனுக்குப் பின் அணியின் முதன்மை விக்கெட் கீப்பர்-பேட்டராக உருவெடுக்க வைக்கும் முயற்சியில் நிர்வாகம் ஈடுபட்டுள்ளது.
அதேவேளையில், அணியின் தலைமைத்துவப் பொறுப்பிலும் புதிய மாற்றங்களை மேற்கொள்ளச் சிஎஸ்கே திட்டமிட்டு வருகிறது. அணியின் தற்போதைய கேப்டன் ருதுராஜ் கெய்க்வாட் மற்றும் சஞ்சு சாம்சன் ஆகியோர் மீதான அதிகப்படியான அழுத்தங்களைக் குறைத்து, இளம் வீரரான ஆயுஷ் மாத்ரேவைச் சுற்றி புதிய அணியைக் கட்டமைக்கும் நோக்கில் அவருக்கு முக்கியப் பொறுப்புகளை வழங்க நிர்வாகம் வியூகம் அமைத்து வருகிறது. மேலும், மினி ஏலத்தில் வெளிநாட்டு அதிரடி ஆட்டக்காரர் ஹேரி ப்ரூக் போன்ற முன்னணி வீரர்களை வாங்க நிதி ஒதுக்கீடுகளைத் தயார் செய்து வருவதாகவும் தெரிகிறது.
அணியின் இந்த அதிரடி முடிவு குறித்து கிரிக்கெட் வல்லுநர்கள் மற்றும் ரசிகர்கள் மத்தியில் கலவையான கருத்துகள் எழுந்துள்ளன. சஞ்சு சாம்சன் போன்ற அனுபவம் வாய்ந்த சர்வதேச வீரரை ஓரங்கட்டுவது அணிக்குத் தற்காலிகப் பின்னடைவை ஏற்படுத்தக்கூடும் எனக் ஒருதரப்பினரும்; 30 வயதிற்கு உட்பட்ட இளம் வீரர்களுக்கு முன்னுரிமை கொடுத்து அடுத்த 10 ஆண்டுகளுக்கான அணியை உருவாக்குவது நீண்டகால அடிப்படையில் சிஎஸ்கேவிற்குப் பலன் தரும் என மற்றொரு தரப்பினரும் தெரிவித்து வருகின்றனர்.
