திருவண்ணாமலை அருள்மிகு அருணாசலேஸ்வரர் திருக்கோயிலுக்குச் சாமி தரிசனம் செய்ய வந்த முன்னாள் இந்து சமய அறநிலையத் துறை அமைச்சர் பி.கே. சேகர்பாபு, வி.ஐ.பி (VIP) தரிசன முன்னுரிமை அளிக்கப்படாத சூழலில் சாதாரணப் பொதுமக்களுடன் பொது தரிசன வரிசையில் இணைந்து நின்று சாமி தரிசனம் செய்தது இணையத்தில் வைரலாகி வருகிறது.
திமுக முன்னாள் அமைச்சரான பி.கே. சேகர்பாபு, திருவண்ணாமலை அண்ணாமலையார் கோயிலுக்கு வருகை தந்தார். திருக்கோயிலின் வடக்கு கோபுரம் வழியாக உள்ளே வருகை தந்த அவர், கொடிமரம் அருகே அமைந்துள்ள சம்பந்த விநாயகரை வழிபட்ட பின்னர், வைகுந்த வாயில் வழியாகச் சென்று அண்ணாமலையாரை மனமுருகி தரிசனம் செய்தார். அதனைத் தொடர்ந்து, உண்ணாமலை அம்மனை தரிசனம் செய்வதற்காக அவர் அம்மன் சன்னதியை நோக்கிச் சென்றார்.
ஆரம்பத்தில் உண்ணாமலை அம்மன் சன்னதிக்குச் செல்ல வி.ஐ.பி சிறப்பு வரிசையில் அவர் காத்துக்கொண்டிருந்த நிலையில், கோயிலில் பணியில் இருந்த அதிகாரிகளோ அல்லது காவலர்களோ அவரைக் கவனித்துச் சிறப்பு ஏற்பாடுகளைச் செய்யவில்லை எனக் கூறப்படுகிறது. இதையடுத்து, நீண்ட நேரம் காத்திருப்பதைத் தவிர்க்க நினைத்த முன்னாள் அமைச்சர் சேகர்பாபு, எவ்வித அதிகார பந்தாவும் காட்டாமல் அமைதியாகப் பொதுமக்களுக்கான பொது தரிசன வரிசையிலேயே சென்று இணைந்து நின்று உண்ணாமலை அம்மனை தரிசித்தார்.
தான் அமைச்சராகப் பதவி வகித்த காலத்தில் கோயில்களில் வி.ஐ.பி தரிசனக் கலாச்சாரத்தை முறைப்படுத்த நடவடிக்கை எடுக்கப்படும் எனக் கூறி வந்த சேகர்பாபு, தற்போது முன்னாள் அமைச்சரான நிலையில் அதிகாரிகளின் கவனிப்பின்றிப் பொது வரிசையில் நின்று தரிசனம் செய்தது தொடர்பான செய்திகள் சமூக வலைத்தளங்களில் பரவி அரசியல் மற்றும் ஆன்மீக வட்டாரங்களில் விவாதப் பொருளாக மாறியுள்ளன.
