விநாயகர் சதுர்த்தி பண்டிகையை முன்னிட்டு 3 நாட்கள் தொடர் விடுமுறை வந்துள்ளதைத் தொடர்ந்து, சென்னை கோயம்பேடு மார்க்கெட் பகுதியில் அமைந்துள்ள டாஸ்மாக் கடையில் மதுப்பிரியர்கள் திரளாகக் குவிந்ததால் அப்பகுதியில் பெரும் பரபரப்பும் நீண்ட நெரிசலும் ஏற்பட்டுள்ளது. பிற்பகல் 12 மணிக்குக் கடை திறக்கப்பட்ட சில நிமிடங்களிலேயே ரேஷன் கடைகளில் அரிசி, பருப்பு வாங்குவதற்கு நிற்பதைப் போல நூற்றுக்கணக்கானோர் நீண்ட வரிசையில் நின்று மது பாட்டில்களை வாங்கிச் சென்றனர்.
கோயம்பேடு மார்க்கெட் பகுதியில் சுமை தூக்கும் தொழிலாளர்கள், லாரி ஓட்டுநர்கள் மற்றும் பல்வேறு மாவட்டங்களில் இருந்து இரவு முழுவதும் வாகனங்களை ஓட்டி வந்து இறங்கும் ஓட்டுநர்கள் அதிகளவில் இயங்கி வருகின்றனர். நீண்ட தூரப் பயணக் களைப்பு மற்றும் தொடர் விடுமுறையைக் கொண்டாடும் நோக்கில், கடை திறக்கப்பட்டவுடனேயே அவர்கள் திரண்டதால் கூட்டத்தைக் கட்டுப்படுத்த பேருந்து நிலையங்களைப் போல கவுண்டர் 1, கவுண்டர் 2 என தனியாக 4 சிறப்பு வரிசைகள் அமைக்கப்பட்டு மது விநியோகம் நடைபெற்றது.
இருப்பினும், கடையில் மது பாட்டில்களை வாங்கிய சிலர் மார்க்கெட் பகுதியின் பொது இடங்கள் மற்றும் சாலை ஓரங்களிலேயே அமர்ந்து உடனடியாக அருந்துவதால் அப்பகுதியில் பொதுமக்கள் மற்றும் வியாபாரிகளுக்குப் பல்வேறு இடையூறுகள் ஏற்படுவதாகக் குற்றச்சாட்டுகள் எழுந்துள்ளன. அதேவேளையில், கடையில் நிலவும் கடும் கூட்ட நெரிசலைப் பயன்படுத்தி, அருகில் உள்ள சில இடங்களில் நிர்ணயிக்கப்பட்ட விலையை விடக் கூடுதல் விலைக்கு மது பாட்டில்கள் சட்டவிரோதமாக விற்பனை செய்யப்படுவதாகவும் மதுப்பிரியர்கள் புகார் தெரிவித்துள்ளனர்.
நேரம் செல்லச் செல்லக் கூட்டம் குறையாமல் தொடர்ந்து அதிகரித்து வந்த நிலையில், மார்க்கெட் பகுதி பாதுகாப்பு மற்றும் போக்குவரத்துச் சீரமைப்புப் பணிகளில் உள்ளூர் காவல்துறையினர் கூடுதல் கவனம் செலுத்தி வருகின்றனர். பண்டிகைக் கால தொடர் விடுமுறையை முன்னிட்டுச் சென்னையில் இருந்து சொந்த ஊர்களுக்கு மக்கள் படையெடுத்து வரும் வேளையில், தலைநகரின் பிரதான வர்த்தகப் பகுதியில் டாஸ்மாக் கடையில் அலைமோதிய இந்தக் கூட்டம் பெரும் விவாதப் பொருளாக மாறியுள்ளது.
