ரஷ்யா – உக்ரைன் போரை முடிவுக்குக் கொண்டு வருவதற்கான ரஷ்யா, உக்ரைன் மற்றும் அமெரிக்கா ஆகிய மூன்று நாடுகள் பங்கேற்கும் முத்தரப்புச் அமைதிப் பேச்சுவார்த்தை அக்டோபர் மாதத்தில் நடைபெறுவதற்கான சாத்தியக்கூறுகளை நிராகரிக்க முடியாது என கிரெம்ளின் மாளிகை அறிவித்துள்ளது. 4 ஆண்டுகளுக்கும் மேலாக நீடித்து வரும் இந்தப் போரில் புதிய அமைதி முயற்சியாக இது பார்க்கப்படுகிறது.
முன்னதாக, கியிவ் நகரில் நடைபெற்ற சர்வதேச மாநாட்டில் பேசிய உக்ரைன் அதிபரின் தலைமை அதிகாரி கைரிலோ புடானோவ், அக்டோபரில் முத்தரப்புப் பேச்சுவார்த்தை நடத்த உக்ரைன் ஆயத்தமாகி வருவதாகத் தெரிவித்தார். இதனைத் தொடர்ந்து மாஸ்கோவில் செய்தியாளர்களிடம் பேசிய கிரெம்ளின் செய்தித் தொடர்பாளர் டிமிட்ரி பெஸ்கோவ், “அக்டோபரில் பேச்சுவார்த்தை நடைபெறுவதற்கான சாத்தியக்கூறுகளை ரஷ்யா மறுக்கவில்லை; தகுந்த நேரத்தில் இது தொடர்பான இறுதி முடிவுகள் எடுக்கப்படும்” எனத் தெரிவித்துள்ளார்.
அமெரிக்க அதிபர் டொனால்ட் டிரம்பின் சிறப்புத் தூதர்களான ஜாரெட் குஷ்னர் மற்றும் ஸ்டீவ் விட்காஃப் ஆகியோர் மாஸ்கோவில் ரஷ்ய அதிபர் விளாடிமிர் புடினையும், கியிவில் உக்ரைன் அதிபர் வோலோடிமிர் ஜெலென்ஸ்கியையும் சந்தித்துப் பேச்சுவார்த்தை நடத்தியதைத் தொடர்ந்து இந்த இராஜதந்திர வேகம் அதிகரித்துள்ளது. பேச்சுவார்த்தையை அபுதாபி, துருக்கி அல்லது சுவிட்சர்லாந்து ஆகிய நடுநிலையான இடங்களில் நடத்துவது குறித்து பரிசீலிக்கப்பட்டு வருகிறது.
இருப்பினும், டான்பாஸ் உள்ளிட்ட நிலப்பரப்பு விவகாரங்களில் (Territorial Issues) இரு நாடுகளுக்கும் இடையே இன்னும் இறுதியான உடன்பாடு எட்டப்படவில்லை என அதிபர் புடினின் வெளியுறவுக் கொள்கை ஆலோசகர் யூரி உஷாகோவ் சுட்டிக்காட்டியுள்ளார். நில எல்லைப் பகிர்வு மற்றும் இறையாண்மை தொடர்பான முக்கிய முரண்பாடுகள் தீர்க்கப்பட்ட பின்னரே இந்த முத்தரப்பு அமைதி மாநாடு உத்தியோகபூர்வமாகத் தொடங்கும் என அரசியல் வல்லுநர்கள் கருதுகின்றனர்.
