செயற்கை நுண்ணறிவு (AI) தொழில்நுட்ப வளர்ச்சியை மெதுவாக்க வேண்டும் என்றும் கூடுதல் கட்டுப்பாடுகளை விதிக்க வேண்டும் என்றும் கூகுள், ஆந்த்ரோபிக் மற்றும் ஓபன்ஏஐ போன்ற முன்னணி அமெரிக்கத் தொழில்நுட்ப நிறுவனங்களின் தலைமைச் செயல் அதிகாரிகள் கோரிக்கை விடுத்துள்ள நிலையில், அமெரிக்க அதிபர் டொனால்ட் டிரம்ப் அந்த கோரிக்கைகளை முற்றிலுமாக நிராகரித்துள்ளார். ஏஐ துறைக்குக் கடுமையான கட்டுப்பாடுகளை விதிப்பது அமெரிக்காவின் தொழில்நுட்ப மேலாதிக்கத்தைப் பாதித்துச் சீனாவுக்கு சாதகமாக அமைந்துவிடும் என்று அவர் எச்சரித்துள்ளார்.
தனது ‘ட்ரூத் சோஷியல்’ (Truth Social) சமூக வலைதளப் பக்கத்தில் இது குறித்துப் பதிவிட்டுள்ள அதிபர் டிரம்ப், “செயற்கை நுண்ணறிவுத் தொழில்நுட்பத்தைக் கட்டுப்படுத்த வலுவான மற்றும் புத்திசாலித்தனமான ஒரு அமெரிக்க அதிபர் மட்டுமே போதுமானது” எனக் குறிப்பிட்டுள்ளார். ஆந்த்ரோபிக் நிறுவனத்தின் தலைமை நிர்வாகி டேரியோ அமோடேய் உள்ளிட்ட தொழில்நுட்ப வல்லுநர்கள் ஏஐ கட்டுப்பாடுகள் குறித்துப் பேசி வருவதைச் சுட்டிக்காட்டிய அவர், தனது நிர்வாகம் ஏற்கனவே ஏஐ நிறுவனங்கள் தவறு செய்வதையோ அல்லது தவறான வழியில் செல்வதையோ வெற்றிகரமாகத் தடுத்து நிறுத்தியுள்ளது என்றும் தெரிவித்துள்ளார்.
அமெரிக்காவில் ஏஐ தரவு மையங்கள் (Data Centers) அமைக்கப்படுவதற்கும் அதன் விரைவான வளர்ச்சிக்கும் எதிராகச் சிலர் சதிப் பிரச்சாரம் செய்து வருவதாகவும், இத்தகைய கட்டுப்பாடுகளால் ஒரே பலனை அடையப்போவது சீனா மட்டுமே என்றும் டிரம்ப் சாடியுள்ளார். “ஏஐ ரேஸில் யார் முதலிடம் பிடிக்கிறார்களோ, அவர்களே உலகை ஆள்வார்கள்; அமெரிக்கா தற்போது சீனாவை விட முன்னிலையில் உள்ளது, அந்த நிலையை நாங்கள் தொடர்ந்து தக்கவைப்போம்” என்று அவர் திட்டவட்டமாக முழங்கியுள்ளார்.
ஏஐ தொழில்நுட்பம் மனிதகுலத்திற்கு ஆபத்தாக மாறக்கூடும் எனத் தொழில்நுட்ப நிறுவனங்களின் தலைவர்களே எச்சரித்து வரும் சூழலில், டிரம்பின் இந்தத் தடையற்றக் கொள்கை உலகளவில் பெரும் விவாதத்தைக் கிளப்பியுள்ளது. அமெரிக்க அரசு எவ்விதக் கடுமையான சட்டக் கட்டுப்பாடுகளையும் விதிக்கப் போவதில்லை என்பதால், சர்வதேச அளவில் ஏஐ பாதுகாப்பு மற்றும் நெறிமுறைகள் குறித்த கவலைகள் மேலும் அதிகரித்துள்ளன.
