பின்லாந்து வளைகுடாவில் சர்வதேச வான்வெளியை நோக்கிப் பறந்து வந்த ரஷ்யாவின் தாக்குதல் போர் விமானங்களை, நேட்டோ அமைப்பின் உறுப்பு நாடுகளான பின்லாந்து மற்றும் சுவீடன் ஆகிய நாடுகளின் போர் விமானங்கள் அவசரமாகப் பாய்ந்து சென்று வழிமறித்து எச்சரித்துள்ள சம்பவம் பெரும் பரபரப்பை ஏற்படுத்தியுள்ளது.
பல்டிக் கடல் பகுதியில் ரஷ்ய ராணுவத்தின் Tu-134 ரகப் போக்குவரத்து விமானம், MiG-31 மற்றும் Su-30 ரகப் போர் விமானங்களின் பாதுகாப்புடன் சர்வதேச வான்வெளியில் ரோந்து பணியில் ஈடுபட்டது. இதைக் கண்டறிந்த நேட்டோ வான் பாதுகாப்புப் படை, உடனடியாகப் பின்லாந்து விமானப் படையின் F/A-18 ஹார்னட் மற்றும் சுவீடனின் JAS 39 கிரிபென் போர் விமானங்களை விண்ணில் ஏவி, ரஷ்ய விமானப் படையைக் கண்காணித்து வெற்றிகரமாக வழிமறித்தது.
நேட்டோ அமைப்பில் புதிதாக இணைந்த பின்லாந்து மற்றும் சுவீடன் நாடுகள் இணைந்து நடத்திய முதல் கூட்டமைப்பு வழிமறிப்புப் பணி இதுவாகும். உக்ரைன் மீதான படையெடுப்பு தொடரும் நிலையில், ஐரோப்பிய உளவுத்துறை தலைவர்கள் “அடுத்த சில மாதங்களுக்குள் நேட்டோ எல்லைப் பகுதிகளில் ரஷ்யா திடீர் தாக்குதல்களையோ அல்லது நாசவேலைகளையோ நடத்தக்கூடும்” என எச்சரிக்கை விடுத்துள்ள சூழலில் இந்தச் சம்பவம் நிகழ்ந்துள்ளது.
நேட்டோவின் கிழக்கு எல்லைப் பகுதிகளில் போலந்து, லத்வியா உள்ளிட்ட நாடுகளும் தங்களது வான் பாதுகாப்புப் படைகளை முழு தயார் நிலையில் வைத்துள்ளன. ரஷ்யாவின் தொடர் அச்சுறுத்தல்களை எதிர்கொள்ள நேட்டோ நாடுகள் கூட்டாக எல்லைப் பாதுகாப்பை தீவிரப்படுத்தி வரும் நிலையில், இந்த வான்வெளி வழிமறிப்பு நிகழ்வு ஐரோப்பியப் பிராந்தியத்தில் போர் பதற்றத்தை மேலும் அதிகரித்துள்ளது.
