செங்கல்பட்டு மாவட்டம் மதுராந்தகம் சட்டப்பேரவைத் தொகுதியில் வரும் அக்டோபர் 6-ஆம் தேதி இடைத்தேர்தல் நடைபெற உள்ளது. இதனை முன்னிட்டு, தமிழக வெற்றிக் கழகத் தலைவரும் முதலமைச்சருமான விஜய் தொகுதி முழுவதும் சுமார் 45 கிலோமீட்டர் தொலைவிற்குப் பிரம்மாண்ட ரோடு ஷோ மூலம் வாக்கு சேகரிக்கவுள்ளார். செங்கல்பட்டு வித்யாசாகர் கல்லூரி அருகே பிரச்சார வேனில் ஏறும் விஜய், மேல்மருவத்தூர் ஆதிபராசக்தி கோயிலில் வழிபாடு செய்த பிறகு தனது பயணத்தைத் தொடங்கத் திட்டமிட்டுள்ளார்.
இந்த ரோடு ஷோ மாமண்டூரில் தொடங்கி படாளம், மதுராந்தகம் புறவழிச்சாலை, எல் எண்டத்தூர், ராமாபுரம், எலப்பாக்கம், உரத்தி, கடமலைப்புத்தூர், அச்சிறுப்பாக்கம், மேல்மருவத்தூர், சோத்துப்பாக்கம், சித்தாமூர் வழியாகச் சென்று சரவம்பாக்கம் மற்றும் மாம்பாக்கம் வரை நடைபெறவுள்ளது. வழிநெடுகிலும் உள்ள 39 முக்கியச் சந்திப்பு இடங்களில் தனது வாகனத்தை நிறுத்திப் பொதுமக்களைச் சந்திக்க முதல்வர் விஜய் திட்டமிட்டுள்ளார். இந்த பிரம்மாண்டப் பயணத்தை முன்னிட்டு, மதுராந்தகம் தொகுதியில் உள்ள 285 வாக்குச்சாவடிகள் 10 மண்டலங்களாகப் பிரிக்கப்பட்டு, ஏற்பாட்டுப் பணிகளைக் கவனிக்க 10 அமைச்சர்கள் பொறுப்பாளர்களாக நியமிக்கப்பட்டுள்ளனர்.
மேலும், பிரச்சாரப் பாதையில் ஒவ்வொரு 5 கிலோமீட்டர் தொலைவிற்கும் ஒரு சட்டமன்ற உறுப்பினர் வீதம் பொறுப்பேற்று பணிகளை மேற்கூறுமாறு கட்சித் தலைமை அறிவுறுத்தியுள்ளது. மதுராந்தகம் தொகுதி முழுவதும் உள்ள கூட்டத்தைக் கட்டுப்படுத்தவும் பாதுகாப்பை உறுதி செய்யவும் ஆயிரக்கணக்கான காவல்துறையினர் பாதுகாப்புப் பணியில் ஈடுபடுத்தப்பட்டுள்ளனர். இத்தேர்தல் களம் இறுதிக்கட்டத்தை எட்டியுள்ள நிலையில், முதல்வர் விஜய்யின் இந்த ரோடு ஷோ அரசியல் வட்டாரத்தில் பெரும் எதிர்பார்ப்பை ஏற்படுத்தியுள்ளது.
