தமிழ்நாட்டைச் சேர்ந்த பெண்கள் வெளிமாநிலங்களில் வசித்து வந்தாலும், சொந்த ஊருக்கு வந்து அரசு மருத்துவமனைகளில் குழந்தை பெற்றெடுத்தால் அவர்களுக்கு ‘தாய்மாமன் தங்க மோதிரம்’ வழங்கப்படும் என மக்கள் நல்வாழ்வுத்துறை அறிவித்துள்ளது. இத்திட்டத்தின் கீழ் பயன்பெறுவதற்கான தகுதி நடைமுறைகளில் அரசு தற்போது முக்கிய தளர்வுகளை வழங்கியுள்ளது. இதன் மூலம் பிற மாநிலங்களில் பணிநிமித்தமாகவோ அல்லது குடும்பத்துடனோ வசிக்கும் தமிழ்நாட்டைச் சேர்ந்த தாய்மார்கள் பயனடைவர்.
முன்னதாக, இத்திட்டத்தில் பயன்பெறத் தாயின் ஆதார் அட்டையில் தமிழ்நாட்டு முகவரி கட்டாயமாக இருக்க வேண்டும் என்ற விதிமுறை நடைமுறையில் இருந்தது. இதனால், பிற மாநில முகவரி கொண்ட ஆவணங்களைச் சமர்ப்பித்த தமிழ்நாட்டுப் பெண்களுக்குத் தங்க மோதிரம் வழங்குவதில் சிரமங்கள் எழுந்தன. இதைக் கருத்தில் கொண்டு, வெளிமாநிலங்களில் வசித்தாலும் தமிழ்நாட்டில் உள்ள தாய் வீட்டிற்கு வந்து அரசு மருத்துவமனையில் பிரசவிக்கும் தாய்மார்களுக்கு இத்திட்டத்தைச் நீட்டிக்க அரசு முடிவெடுத்துள்ளது.
அரசின் இந்த நிபந்தனை தளர்வு அறிவிப்புக்கு பொதுமக்கள் மற்றும் வெளிமாநிலங்களில் வாழும் தமிழர்களிடையே பெரும் வரவேற்பு கிடைத்துள்ளது. தமிழ்நாட்டில் உள்ள அரசு மருத்துவமனைகளில் பாதுகாப்பான பிரசவங்களை ஊக்குவிக்கவும், தாய்-சேய் நலனை உறுதி செய்யவும் இத்திட்டம் செயல்படுத்தப்பட்டு வருகிறது. அரசின் இந்த நடவடிக்கை மூலம் தகுதியான பயனாளிகள் விடுபடாமல் பலனடைவார்கள் என்று எதிர்பார்க்கப்படுகிறது.
தற்போது வெளியிடப்பட்டுள்ள இந்தத் தளர்வுகளின் அடிப்படையில், உரிய சான்றுகளைச் சமர்ப்பித்து தாய்மார்கள் தங்களுக்கான தங்க மோதிரத்தைப் பெற்றுக்கொள்ளலாம். மேலும், இத்திட்டம் குறித்த கூடுதல் விவரங்கள் மற்றும் வழிகாட்டுதல்கள் அந்தந்தப் பகுதி அரசு மருத்துவமனைகள் மூலம் தாய்மார்களுக்கு வழங்கப்பட்டு வருகின்றன.
