தமிழகத்தின் தாராபுரம் மற்றும் மதுராந்தகம் சட்டமன்றத் தொகுதிகளுக்கான இடைத்தேர்தல் வாக்கு எண்ணிக்கை பலத்த பாதுகாப்புடன் தொடங்கி நடைபெற்று வருகிறது. இதில் தாராபுரம் தொகுதியில் அதிமுக வேட்பாளர் கே. பானுமதி தொடக்கச் சுற்றுகளில் சுமார் 600 வாக்குகள் வித்தியாசத்தில் முன்னிலை பெற்று வருகிறார். இதனால் அத்தொகுதியில் போட்டியிடும் தமிழக வெற்றிக் கழக வேட்பாளர் பி. சத்தியபாமா மற்றும் திமுக வேட்பாளர் எஸ். சுகன்யா ஆகியோர் பின்னடைவைச் சந்தித்துள்ளனர்.
திருப்பூர் மாவட்டம் தாராபுரத்தில் 14 மேசைகளில் 23 சுற்றுகளாக வாக்கு எண்ணிக்கை நடைபெற்று வரும் நிலையில், தபால் வாக்குகள் மற்றும் முதற்கட்ட மின்னணு வாக்குப்பதிவு எந்திர வாக்குகள் எண்ணப்பட்டுள்ளன. தபால் வாக்குகள் எண்ணிக்கையில் தவெக சிறிய அளவில் முன்னிலை வகித்தபோதிலும், எந்திர வாக்குகள் எண்ணப்பட்டபோது அதிமுக முன்னிலைக்கு வந்துள்ளது. கடந்த தேர்தலில் அதிமுக சார்பில் போட்டியிட்டு வெற்றிபெற்ற சத்தியபாமா, தற்போது தவெக வேட்பாளராகக் களமிறங்கியிருப்பது இங்கு குறிப்பிடத்தக்க அம்சமாகும்.
மற்றொரு தொகுதியான செங்கல்பட்டு மாவட்டம் மதுராந்தகத்தில் வாக்கு எண்ணிக்கை 20 சுற்றுகளாகத் தொடர்ந்து நடைபெற்று வருகிறது. அங்கு ஆளுங்கட்சியான தவெக வேட்பாளர் கே. மரகதம் குமரவேல் மற்றும் திமுக, அதிமுக வேட்பாளர்களுக்கிடையே கடும் போட்டி நிலவி வருகிறது. இரு தொகுதிகளிலும் அசம்பாவிதங்கள் ஏதும் ஏற்படாத வண்ணம் ஆயிரக்கணக்கான காவலர்கள் பாதுகாப்புப் பணியில் ஈடுபடுத்தப்பட்டுள்ளனர்.
வாக்கு எண்ணும் மையங்களின் வெளியே குவிந்துள்ள வெவ்வேறு அரசியல் கட்சிகளின் தொண்டர்கள் முன்னிலை நிலவரங்களை உன்னிப்பாகக் கவனித்து வருகின்றனர். அடுத்தடுத்த சுற்றுகளின் வாக்கு எண்ணிக்கை முடிவடையும் போது நண்பகலுக்குள் இரு தொகுதிகளின் இறுதி வெற்ற நிலவரம் தெரியவரும்.
