சவூதி புரோ லீக் தொடரில் அல் அவ்வல் பார்க் மைதானத்தில் வியாழக்கிழமை இரவு நடைபெற்ற விறுவிறுப்பான லீக் போட்டியில் அல் நசர் அணி, அல் கோலூத் (Al-Kholood) அணியை 5-3 என்ற கோல் கணக்கில் வீழ்த்தி வெற்றி பெற்றது. இப்போட்டியில் அல் நசர் அணியின் கேப்டனும் நட்சத்திர வீரருமான கிறிஸ்டியானோ ரொனால்டோ இரண்டாம் பாதியில் வெறும் 15 நிமிட இடைவெளியில் (66, 72 மற்றும் 81-வது நிமிடங்களில்) மூன்று கோல்களைத் தொடர்ச்சியாக அடித்து ஹேட்ரிக் சாதனை படைத்தார். இதன் மூலம் அல் நசர் அணி லீக் புள்ளிப்பட்டியலில் தொடர்ந்து வலுவான இடத்தில் நீடிக்கிறது.
இப்போட்டியில் அடித்த மூன்று கோல்களையும் சேர்த்து ரொனால்டோவின் தொழில்முறை கால்பந்து வாழ்க்கையின் மொத்த கோல்களின் எண்ணிக்கை 985 ஆக உயர்ந்துள்ளது. வரலாற்றுச் சிறப்புமிக்க 1,000 கோல்கள் என்ற இமாலய இலக்கை அடைவதற்கு அவருக்கு இன்னும் வெறும் 15 கோல்கள் மட்டுமே தேவைப்படுகின்றன. மேலும், இது ரொனால்டோவின் கால்பந்து வாழ்க்கையில் பதிவான 67-வது ஹேட்ரிக் கோல் என்பது குறிப்பிடத்தக்கது.
போட்டியில் ஜாவோ ஃபெலிக்ஸ் நான்கு கோல்களுக்கு அசிஸ்ட் செய்து முக்கியப் பங்கு வகித்தார். ரொனால்டோவின் இந்த அதிரடி ஆட்டம் மற்றும் 1,000 கோல் இலக்கை நெருங்கி வரும் மைல்கல் குறித்துப் உலகெங்கிலும் உள்ள கால்பந்து ரசிகர்களும் விளையாட்டு விமர்சகர்களும் தங்களது வாழ்த்துகளைத் தெரிவித்து வருகின்றனர்.
நடப்பு சவூதி புரோ லீக் தொடரில் அல் நசர் அணி 28 புள்ளிகளுடன் புள்ளிப்பட்டியலில் முன்னணியில் உள்ளது.
ரொனால்டோவின் அடுத்தடுத்த போட்டிகளில் அவரது 1,000 கோல்கள் சாதனையை நோக்கிய பயணத்தைக் கால்பந்து உலகம் ஆவலுடன் எதிர்பார்த்துக் காத்துள்ளது.
