மத்திய கிழக்கு பிராந்தியத்தில் அமைந்துள்ள அமெரிக்க மற்றும் அமெரிக்க நட்பு நாடுகளின் ராணுவ தளங்கள் மீது ஈரானிய படைகள் தொடர்ச்சியாக ஏவுகணைகள் மற்றும் ட்ரோன்களைப் பயன்படுத்தித் தாக்குதல் நடத்தின. செயற்கைக்கோள் புகைப்படங்கள் மற்றும் அமெரிக்க பென்டகன் மதிப்பீடுகளை மேற்கோள் காட்டி வெளியான புலனாய்வு அறிக்கையின்படி, 24-க்கும் மேற்பட்ட ராணுவ தளங்களில் சுமார் 274 கட்டிடங்கள் மற்றும் கட்டமைப்புகள் சேதமடைந்துள்ளன. இந்தத் தாக்குதல்களால் ஏற்பட்ட கட்டமைப்பு மற்றும் உபகரண சேதங்களைச் சரிசெய்ய வாஷிங்டனுக்கு 5 பில்லியன் முதல் 15 பில்லியன் அமெரிக்க டாலர் வரை செலவாகும் எனக் கணக்கிடப்பட்டுள்ளது.
ஈரானியப் படைகள் முதன்முதலாக அமெரிக்காவின் வான் பாதுகாப்பு அமைப்புகள், ரேடார்கள் மற்றும் விமானக் கொட்டகைகளைக் (hangars) குறிவைத்துத் தாக்குதல் நடத்தியுள்ளன. குவைத், சவூதி அரேபியா, பஹ்ரைன், ஈராக், ஜோர்டான், ஓமன், கதார் மற்றும் ஐக்கிய அரபு அமீரகம் ஆகிய நாடுகளில் உள்ள அமெரிக்க ராணுவ இடங்கள் இதனால் பாதிக்கப்பட்டுள்ளன. குறிப்பாகக் குவைத்தில் உள்ள அலி அல் சேலம் வான் தளத்தின் மீது 30-க்கும் மேற்பட்ட முறை தாக்குதல்கள் நடத்தப்பட்டு, ஏராளமான விமானங்கள் மற்றும் கட்டிடங்கள் கடுமையாகச் சேதமடைந்துள்ளதாக அந்த அறிக்கையில் குறிப்பிடப்பட்டுள்ளது.
இந்தத் தாக்குதல்கள் மற்றும் கட்டமைப்புச் சேதங்கள் காரணமாக, மத்திய கிழக்கு மண்டலத்தில் தங்களது ராணுவ இருப்பை மாற்றி அமைக்க அமெரிக்கா பரிசீலித்து வருகிறது. ஈரானின் ஏவுகணை எல்லைக்கு அப்பாற்பட்ட பாதுகாப்பான பகுதிகளுக்குத் தங்களது ராணுவ தளவாடங்கள் மற்றும் பணியாளர்களை மாற்றுவது குறித்து வாஷிங்டன் ஆலோசித்து வருவதாக மூத்த அதிகாரிகள் தெரிவித்துள்ளனர். மேலும், அக்டோபர் 16 வரையிலான ஈரானிய போர் நடவடிக்கைகளுக்காகப் பென்டகன் ஏற்கனவே 47.1 பில்லியன் டாலர் வரை செலவிட்டுள்ளதாகக் கூடுதல் தரவுகள் காட்டுகின்றன.
தற்போது சேதமடைந்த ராணுவக் கட்டமைப்புகள் மற்றும் கண்காணிப்பு அமைப்புகளைச் சீரமைக்கும் பணிகள் அமெரிக்கப் படைகளால் திட்டமிடப்பட்டு வருகின்றன.
அதேவேளையில் பிராந்தியத்தில் நிலவும் பாதுகாப்பற்ற சூழலைக் கருத்தில் கொண்டு, தாக்குதலுக்கு ஆளான அமெரிக்கத் தளங்களில் பாதுகாப்பு நடவடிக்கைகள் தீவிரப்படுத்தப்பட்டுள்ளன.
