ரஷ்ய அதிபர் விளாடிமிர் புடினின் சிறப்புத் தூதரான கிரில் டிமிட்ரீவ் (Kirill Dmitriev) என்பவரை அமெரிக்க அதிபர் டொனால்ட் டிரம்ப் வெள்ளை மாளிகையில் சந்தித்துப் பேச்சுவார்த்தை நடத்தினார். இந்தச் சந்திப்பிற்குப் பிறகு செய்தியாளர்களிடம் பேசிய டிரம்ப், உக்ரைன் போரை முடிவுக்குக் கொண்டுவருவதற்கான பெரிய ஒப்பந்தம் விரைவில் சாத்தியமாகும் எனக் கூறியுள்ளார். இந்த ஒப்பந்தம் உக்ரைனுடன் மட்டும் நிற்காமல் ஒட்டுமொத்த ஐரோப்பிய கண்டத்தையும் உள்ளடக்கியதாக அமைவதற்கு வாய்ப்புள்ளதாக டிரம்ப் தெரிவித்துள்ளார்.
அமெரிக்க முதல் பெண்மணி மெலனியா டிரம்ப் ஏற்பாடு செய்திருந்த மனிதாபிமான உதவி தொடர்பான நிகழ்வில் பங்கேற்பதற்காக ரஷ்ய மற்றும் உக்ரைன் பிரதிநிதிகள் வாஷிங்டன் வந்திருந்தனர். உக்ரைனின் ஓலெஷ்கி நகரில் மேற்கொள்ளப்பட்ட தற்காலிகப் போர்நிறுத்தம் மற்றும் நிவாரணப் பணிகளை அங்கீகரிக்கும் வகையில் இந்த விழா நடைபெற்றது. எனினும், ரஷ்யத் தூதர் டிமிட்ரீவை ஓவல் அலுவலகத்தில் தனியாகச் சந்தித்துப் பேசிய டிரம்ப், அங்கு வந்திருந்த உக்ரைன் நாட்டின் பிரதிநிதிகளைச் சந்திக்கவில்லை என்பது குறிப்பிடத்தக்கது.
இது குறித்துத் கருத்து தெரிவித்த டிரம்ப், பேச்சுவார்த்தையின் விரிவான விவரங்களை வெளியிட மறுத்தாலும், “இது அனைவருக்கும் மகிழ்ச்சியளிக்கும் வகையில் ஒரு பெரிய மற்றும் அழகான ஒப்பந்தமாக இருக்கும்” எனக் குறிப்பிட்டுள்ளார். அதேவேளையில், ஐரோப்பிய நாடுகள் மற்றும் உக்ரைன் அரசுகள் இந்த அமைதி திட்டத்திற்கு ஒப்புதல் அளித்துள்ளனவா என்பது குறித்த தகவல்களை வெள்ளை மாளிகை இன்னும் அதிகாரப்பூர்வமாகப் பகிரவில்லை.
வரவிருக்கும் நாட்களில் அபுதாபியில் அமெரிக்கா தலைமையில் ரஷ்யா மற்றும் உக்ரைன் தரப்புகளுக்கு இடையே அமைதிப் பேச்சுவார்த்தைகள் நடைபெறவுள்ள நிலையில் இந்தச் சந்திப்பு நடந்துள்ளது.
போர்ச் சூழலைத் தணித்து நிலையான அமைதியை ஏற்படுத்துவதற்கான ஆலோசனைகள் தொடர்ந்து தீவிரமடைந்து வருகின்றன.
