ஜம்மு-காஷ்மீரின் கிஷ்ட்வார் மாவட்டத்தில் உள்ள மலைப்பகுதியில் ரோந்துப் பணிக்காகச் சென்ற இரண்டு சிறப்பு காவல் அதிகாரிகள் மாயமானதைத் தொடர்ந்து, பாதுகாப்புப் படையினர் தீவிர தேடுதல் வேட்டையில் ஈடுபட்டுள்ளனர்.
கிஷ்ட்வார் மாவட்டத்தின் டச்சான் (Dachhan) மற்றும் மர்வா (Marwah) வனப்பகுதியில் சிறப்பு நடவடிக்கைக் குழுவைச் (SOG) சேர்ந்த ரஷ்பால் குமார் மற்றும் பாபி சந்த் ஆகிய இரண்டு சிறப்பு காவல் அதிகாரிகள் (SPOs) புதன்கிழமை மாயமாகியுள்ளனர். கியார் (Kiyar) முகாமிலிருந்து பஸ்னான் (Basnan) பகுதியில் உள்ள ராணுவ முகாமை நோக்கி இவர்கள் நடந்து சென்று கொண்டிருந்த போது தொடர்பு துண்டிக்கப்பட்டது. மாலை நேரத்தில் தெஹர்னா (Deharna) வனப்பகுதியில் துப்பாக்கிச் சூடு சத்தம் கேட்டதாகவும், அதன் பிறகு அவர்களது செல்போன்கள் அணைக்கப்பட்டு தொடர்பு கொள்ள முடியாத நிலை ஏற்பட்டதாகவும் தகவல்கள் தெரிவிக்கின்றன.
அடர்ந்த வனப்பகுதி மற்றும் தொலைத்தொடர்பு வசதி இல்லாத ‘ஷேடோ ஜோன்’ (Shadow zone) பகுதியாக இது இருப்பதால் அதிகாரிகளைத் தொடர்பு கொள்வதில் சிரமம் ஏற்பட்டுள்ளது. இந்தச் சம்பவத்தை இப்போதே தீவிரவாதத் தாக்குதலுடன் தொடர்புபடுத்திப் பார்ப்பது முன்கூட்டிய முடிவாகிவிடும் என்றும், முழுமையான விவரங்கள் தெரிந்த பிறகே எதையும் உறுதிப்படுத்த முடியும் என்றும் காவல்துறை அதிகாரிகள் தெரிவித்துள்ளனர்.
தற்போது காணாமல் போன இரண்டு காவலர்களைக் கண்டுபிடிக்க இந்திய ராணுவம், சிஆர்பிஎஃப் (CRPF) மற்றும் ஜம்மு-காஷ்மீர் காவல்துறையினர் இணைந்து கூட்டுத் தேடுதல் நடவடிக்கையைத் தொடங்கியுள்ளனர். கரடுமுரடான மலைப்பகுதிகளில் கூடுதல் படைகள் அனுப்பப்பட்டு, வனப்பகுதி முழுவதும் தீவிர சோதனை நடத்தப்பட்டு வருகிறது.
