சென்னையை அடுத்த மாமல்லபுரத்தில் உள்ள தனியார் விடுதியில் புதன்கிழமை (நவம்பர் 11) நடைபெற்ற இந்தக் கூட்டத்தில், அனைத்து தவெக சட்டமன்ற உறுப்பினர்களையும் முதல்வர் விஜய் தனித்தனியே சந்தித்து ஆலோசனை நடத்தினார். மக்கள் நலத் திட்டங்களை மக்களிடம் கொண்டு செல்வதில் முழு கவனம் செலுத்த வேண்டும் என்றும், எதிர்க்கட்சிகளின் விமர்சனங்கள் மற்றும் அவதூறுப் பிரசாரங்களால் தொய்வடையாமல் பணியாற்ற வேண்டும் என்றும் அவர் அறிவுறுத்தியுள்ளதாக சமயம் தமிழ் செய்தி வெளியிட்டுள்ளது.
மேலும், கட்சிக்குள் அனைவரும் ஒற்றுமையுடன் செயல்பட வேண்டும் என்றும், சர்ச்சைக்குரிய வகையில் பேசுவதையோ அல்லது எதிர்க்கட்சிகளின் அரசியல் வலைகளில் சிக்குவதையோ தவிர்க்க வேண்டும் என்றும் அவர் கேட்டுக்கொண்டுள்ளார்.
கட்சித் தலைமையின் செயல்பாடுகளை உன்னிப்பாகக் கவனித்து வருவதாகவும், தவறான முடிவுகளோ அல்லது ஆசை வார்த்தைகளுக்கு மயங்குவதோ சட்டமன்ற உறுப்பினர்களின் அரசியல் எதிர்காலத்தைப் பாதிக்கும் என்றும் விஜய் எச்சரித்ததாக இந்தியன் எக்ஸ்பிரஸ் நாளிதழ் தெரிவித்துள்ளது.
சட்டம் ஒழுங்கு விவகாரங்களில் காவல்துறைக்கு முழு சுதந்திரம் வழங்கப்பட்டுள்ளதாகக் குறிப்பிட்ட முதல்வர், தன்னைச் சந்திப்பதில் எம்எல்ஏ-க்களுக்கு ஏதேனும் தடைகள் உள்ளதா என்றும் கேட்டறிந்ததாகத் தகவல்கள் வெளியாகியுள்ளன. சமீபத்தில் சில சட்டமன்ற உறுப்பினர்கள் மீது எழுந்த சர்ச்சைகள் மற்றும் எதிர்க்கட்சிகளின் விமர்சனங்களுக்கு மத்தியில் இந்த ஆலோசனைக் கூட்டம் நடைபெற்றுள்ளது குறிப்பிடத்தக்கது.
ஆலோசனைக் கூட்டத்தைத் தொடர்ந்து சட்டமன்ற உறுப்பினர்களுக்கு தீபாவளிப் பரிசுகள் வழங்கப்பட்ட நிலையில், தொகுதிப் பணிகள் மற்றும் வரவிருக்கும் அரசியல் சவால்களை எதிர்கொள்ள எம்எல்ஏ-க்கள் தீவிரமாகத் தயாராகி வருகின்றனர்.
