சவூதி அரேபியாவில் சமூக வலைதளப் பதிவு தொடர்பான வழக்கில் மரண தண்டனை விதிக்கப்பட்ட இலங்கைத் தமிழரான சிவராசா அனோஜன் மீதான அனைத்து சட்ட நடவடிக்கைகளையும் சவூதி அரசு கைவிட்டுள்ளது. இதனையடுத்து, அவர் இன்னும் ஓரிரு வாரங்களில் இலங்கைக்குத் திரும்புவார் என இலங்கை வெளிவிவகார அமைச்சர் விஜித ஹேரத் அதிகாரப்பூர்வமாக அறிவித்துள்ளார்.
கல்முனையைச் சேர்ந்த 24 வயதான தொழில்நுட்பப் பொறியியலாளரான சிவராசா அனோஜன், சவூதி அரேபியாவின் கிழக்கு மாகாணத்தில் பணியாற்றி வந்த போது ஃபேஸ்புக் பதிவு ஒன்று தொடர்பாகக் கைது செய்யப்பட்டார். இந்த வழக்கில் கடந்த செப்டம்பர் 17-ஆம் தேதி சவூதி மேல்முறையீட்டு நீதிமன்றம் அவருக்கு மரண தண்டனை விதித்தது. பின்னர் இலங்கை அரசின் உயர்மட்ட ராஜதந்திரத் தலையீடுகளைத் தொடர்ந்து, அக்டோபர் 14-ஆம் தேதி அந்நாட்டு உச்ச நீதிமன்றம் மரண தண்டனையை ரத்து செய்ததுடன், கடந்த நவம்பர் 9-ஆம் தேதி சவூதி பொதுத் தரப்பு வழக்கறிஞர் அலுவலகம் (Public Prosecution) அவர் மீதான எஞ்சிய அனைத்து வழக்குகளையும் கைவிட முடிவு செய்துள்ளது.
ஜனாதிபதி அநுர குமார திசாநாயக்கவின் வழிகாட்டுதல், வெளிவிவகார அமைச்சகத்தின் தொடர் முயற்சிகள் மற்றும் சவூதி அரேபிய அரசு மற்றும் நீதித்துறையின் ஒத்துழைப்பால் இந்த முழுமையான விடுதலை சாத்தியமானதாக அமைச்சர் விஜித ஹேரத் தெரிவித்துள்ளார். இதற்கிடையே, சிவராசா அனோஜனின் குடும்பத்தினர் கொழும்பில் உள்ள வெளிவிவகார அமைச்சகத்திற்கு நேரில் சென்று, ஜனாதிபதி மற்றும் அரசு அதிகாரிகளுக்குத் தங்களது நன்றிகளைத் தெரிவித்துக் கொண்டனர்.
தற்போது அனைத்து சட்டத் தடைகளும் நீக்கப்பட்டுள்ள நிலையில், சிவராசா அனோஜனை பாதுகாப்பாக இலங்கைக்கு அழைத்து வருவதற்கான பயண ஏற்பாடுகளை இலங்கை அரசாங்கம் முன்னெடுத்து வருகிறது.
