அமெரிக்கா மற்றும் இரான் இடையிலான போர்ப் பதற்றம் அதிகரித்து வரும் சூழலில், ரஷ்யா, சீனா மற்றும் ஐக்கிய அரபு அமீரகத்தைச் சேர்ந்த ராணுவ சரக்கு விமானங்கள் பாகிஸ்தானில் தரையிறங்கியுள்ளதாகத் தகவல்கள் வெளியாகியுள்ளன. தெற்காசிய பிராந்தியத்தில் ஏற்பட்டுள்ள இந்த திடீர் ராணுவ நகர்வுகளை இந்திய பாதுகாப்பு மற்றும் உளவுத்துறை அமைப்புகள் உன்னிப்பாகக் கண்காணித்து வருகின்றன.
கராச்சி மற்றும் ராவல்பிண்டியில் உள்ள நூர் கான் (Nur Khan) விமானப்படைத் தளம் ஆகிய இடங்களில் ரஷ்யாவின் IL-76MD, AN-124 மற்றும் அமீரகத்தின் IL-76 ஆகிய ராணுவ சரக்கு விமானங்கள் வந்து இறங்கியுள்ளதாக ரிபப்ளிக் வேர்ல்ட், இந்துஸ்தான் டைம்ஸ் மற்றும் மாத்ருபூமி உள்ளிட்ட ஊடகங்கள் செய்தி வெளியிட்டுள்ளன. பாகிஸ்தானின் நூர் கான் விமானப்படைத் தளத்தைப் பயன்படுத்தி இரான் மீது அமெரிக்கா தாக்குதல் நடத்தத் திட்டமிட்டுள்ளதாகச் சீன உளவுத்துறை ரஷ்யாவை எச்சரித்ததாகக் கூறப்படும் நிலையில், இந்த விமானங்கள் வந்துள்ளன. எனினும், இந்த விமானங்களில் கொண்டுவரப்பட்ட சரக்குகளின் விவரங்களோ அல்லது அவற்றின் வருகைக்கான அதிகாரப்பூர்வக் காரணங்களோ இதுவரை வெளியிடப்படவில்லை.
மத்திய கிழக்கு மற்றும் வளைகுடா பிராந்தியத்தில் நிலவும் பதற்றங்களுக்கு மத்தியில், பாகிஸ்தான் ஒரு முக்கியத் தளவாட மற்றும் கண்காணிப்பு மையமாக மாறி வருவதை இந்த நிகழ்வுகள் காட்டுவதாகப் பாதுகாப்பு நிபுணர்கள் கருதுகின்றனர். குறிப்பாக, இந்தியாவின் ‘ஆபரேஷன் சிந்தூர்’ நடவடிக்கையின் போது கவனத்தில் இருந்த நூர் கான் விமானப்படைத் தளத்தைச் சுற்றி வெளிநாட்டு ராணுவ விமானங்களின் நடமாட்டம் அதிகரித்திருப்பது இந்தியாவிற்கு முக்கியத்துவம் வாய்ந்ததாகப் பார்க்கப்படுகிறது. இதற்கிடையில், இந்த விமான வருகை குறித்து பாகிஸ்தான், அமெரிக்கா, ரஷ்யா அல்லது சீனா ஆகிய எந்த நாடும் இதுவரை அதிகாரப்பூர்வ விளக்கம் அளிக்கவில்லை.
தற்போது இந்த விமானங்களின் வருகை தொடர்பான தகவல்கள் உறுதிப்படுத்தப்படாத யூகங்களாகவே உள்ள நிலையில், பிராந்திய பாதுகாப்புச் சூழலைக் கருத்தில் கொண்டு இந்திய உளவுத்துறை அமைப்புகள் பாகிஸ்தான் விமானப்படைத் தளங்களின் செயல்பாடுகளைத் தொடர்ந்து கண்காணித்து வருகின்றன.
